BAGUIO CITY—Nagpirma ti Baguio Correspondents and Broadcasters Club, ni Mayor Benjamin Magalong ken ti City Environment and Parks Management Office idi Disiembre 20 iti maysa a Memorandum of Agreement iti panangpasayaat ti BCBC iti maysa a paset ti picnic grove iti Burnham Park.
Nabayagen a maus-usar ti 700 square meter a lugar a pasayaatenda kas media camp nangruna no maangay ti proyekto ti BCBC a Lucky Summer Visitors a pakibimbinnuligan met laeng ti gobierno ti siudad ken dagiti dadduma pay a maseknan.
“Agyaman ti gobierno ti siudad iti BCBC gapu iti ayatyo a mangadaptar iti maysa a paset ti picnic grove iti Burnham Park tapno mapapintas pay. Inrugimi ti programa nga adopt a park dua a tawenen ti napalabas gapu ta agkurkurang iti pondo ti siudad para iti pannakamantener dagiti parke. Isu nga adu nga organisasion ti tumultulong tapno mataginayon ti kinapintas dagiti parketayo,” kinuna ni Mayor Magalong.
Dinawat ni BCBC President Thom Picana kadagiti sumaruno nga opisial ti BCBC nga ipangpangrunada ti proyekto ta kasapulan ti P500,000 tapno mapasayaat ti picnic grove a napanaganan iti Camp Peppot Ilagan, kas pakalaglagipan iti pimmusay nga editor ti lokal a diario ken konsehal iti siudad a ni Peppot Ilagan.
Adbokasia ni Camille Villar para iti pamilia ken aglawlaw: Maysa a nagkaysa a pagimbagan ken kinatalged iti masakbayan
“Aw-awagak ti imatang dagiti sumaruno nga opisial ti BCBC nga ipangpangrunada daytoy a proyekto, gapu ta agpannuray iti dayta ti pannakatungpal ti karitayo iti gobierno ti siudad a mangpapintas iti daytoy a lugar. Maysa daytoy a nakallalagip a gapuanan para kadatayo amin, gapu ta daytoy ti arapaaptayo, ti maipaiggem kadagiti imatayo daytoy a lugar, isu a pabaknangentayo,” kinuna ni Picana.
(Zaldy Comanda/Manila Bulletin)
