Mangnamnama ni Presidente Marcos a mapirmaanna ti singasing a nailian a badiet para iti 2025 sakbay nga aggibus ti tawen, dayta ti kinuna ti maysa nga opisial iti Malakanyang.
“Idi laeng naladaw a malem ti Biernes a naawat ti Malakanyang ti nayimprenta a kopia ti proposed national budget. Mangnamnama ni Presidente Marcos Jr. a maileppas daytoy sakbay nga agpatingga ti tawen," kinuna ni Presidential Communications Office (PCO) Secretary Cesar Chavez.
Idi Lunes, Disiembre 23, nakitaripnong ni Marcos iti Economic Cluster (DOF, DBM, ken NEDA) bayat ti panangrepasona iti singasing a badiet ti pagilian.
Adda met da Executive Secretary Lucas Bersamin ken Department of Public Works and Highways (DPWH) Secretary Manuel Bonoan iti nasao a miting iti Palasio.
Kukua ti TVJ ti trademark nga “Eat Bulaga!”—Court of Appeals
"Nakisarita ni Presidente Marcos Jr. iti Executive Secretary, Economic Cluster, ken ti Secretary of Public Works and Highways bayat ti panangrepasona iti singasing a badiet ti pagilian para iti sumaruno a tawen," kinuna ni Chavez.
Kinuna pay ti hepe ti PCO nga iti laksid dagiti isyu a nangbalkut iti naisingasing a 2025 national budget, saan pay a naisarita ni Marcos ti posibilidad a ma-reenact ti badiet ita a tawen.
"Iti napalabas a dua a mitingda a tinabunuak, awan a pulos ti napagsasaritaanda maipanggep iti dayta (reenacted budget)," kinuna ni Chavez.
Naitantan ti pannakapirma ti naisingasing a P6.352-trillion 2025 national budget tapno maikkan iti gundaway dagiti mangrepaso nga idauluan ti Presidente. Mapirmaan koma daytoy iti Disiembre 20. Nupay kasta, inwaragawag ni Bersamin dua nga aldaw sakbayna a nayalud-od ti pannakaipaulog ti badiet iti sabali nga petsa.
(Betheena Unite/Manila Bulletin)
