Rugian ti gobierno ti panagawat kadagiti bid para iti Ilocos Norte-Ilocos Sur-Abra Irrigation Project inton Enero 2025, segun iti National Irrigation Administration (NIA), kalpasan nga inaprobaran daytoy ni Presidente Ferdinand R. Marcos Jr., kas chairman ti National Economic and Development Authority (NEDA) Board.
“Mayimplementar a dagus daytoy, maysa daytoy a designed and build, isu nga inton Enero, rugianmin iti bidding,” kinuna ni NIA Administrator Eduardo Guillen.
Naponduan ti proyekto iti PhP37.5-bilion a buklen ti maysa a high dam iti Abra, maysa nga afterbay dam iti Nueva Era, ken maysa a transbasin tunnel ken irrigation facilities.
“Gagangay a lima a tawen ti pannakaaramid dti kastoy a proyekto, ngem mabalin a yababa iti tallo agingga iti uppat a tawen laeng no tuloytuloy ti konstruksion.” Kinuna pay ni Guillen.
Kukua ti TVJ ti trademark nga “Eat Bulaga!”—Court of Appeals
“Kayatna a sawen, aggigiddan nga adda mangob-obra iti high dam, iti afterbay dam, sa kadagiti irrigation facility ken transbasin tunnel,” inlawlawag ni Guillen.
Kabalinan a pasayakan ti proyekto ti mapan a 15,000 nga ektaria, ken mabalin a manayonan pay iti 20% babaen ti pannakaipakat ti teknolohia nga alternate wetting ken drying.
Aganay met a 32,600 a pamilia ti mabenepisiaran ti proyekto, segun pay iti NIA.
DInayaw ni Guillen ti koordinasion iti baet dagiti gobierno probinsial ti Ilocos Norte ken Abra iti pannakaisayangkat ti nasao a proyekto a nainaw pay la idi panawen ni dati a presidente Ferdinand Marcos Sr.
Sakbayna, kinuna ni Marcos Jr. a pagaammona ti maipapan iti proyekto idi nagtakem isuna a kas gobernador ti Ilocos Norte ket dinakamatna dagiti pagsayaatan daytoy kadagiti probinsia ti Ilocos Norte, Ilocos Sur, ken Abra. (Raymund Antonio/MB)
