Silulukat pay laeng ti Taiwan nga agala kadagiti agtrabaho nga skilled workers a Filipino ta nangato pay laeng ti panagkasapulanda kadagitoy.
Segun ken ni Taiwan Economic and Cultural Office (TECO) Representative Wallace Chow, ti Filipinas ti “maysa kadagiti kaimportantean a pagtaudan” a mangipapaay kadagiti skilled worker iti Taiwan. “Itantandudomi ti pannakapaadu pay dagiti OFW nga agtrabaho iti Taiwan,” kinunana iti maysa nga interbiu idi Dis. 20.
Segun kenkuana, nangato ti panagkasapulan nangruna iti industria ti semiconductor ta ti Taiwan ti kangrunaan a mamatpataud kadagiti produkto a semiconductor iti sangalubongan.
“Kadagiti sumarsaruno a dekada, kunaek a mabalin a pati industria ti AI (artificial intelligence) ket agkasapulan met iti ad-adu pay nga skilled workers manipud kadagiti kakaarruba ti Taiwan a pagpagilian,” kinuna pay ni Chow. (Joseph Pedrajas/MB)
