Nagtalinaed ni Oleksandr Usyk nga awan pay abakna kalpasan ti naballigi a panangdepensana kadagiti koronana iti heavyweight baben ti unanimous decision kontra ken ni Tyson Fury idi Domingo, Disiembre 22, 2024 (oras iti Filipinas) iti Riyadh, Saudi Arabia.
Agpapada ti iskor dagiti hurado a da Gerardo Martinez, Patrick Morley ken Ignacio Robles a 116-112, pabor ken ni Usyk nga addaanen iti kartada a 23-0 (14 kadagitoy ti knockout).
Daytoy met ti maikadua a pannakaatiw ni Fury (34-2-1) nga agpada nga impaay ni Usyk. Immuna a naglaban dagitoy idi Mayo a nangagawan ni Usyk kadagiti korona nga iniggeman ni Fury.
Iti daytoy maikadua a laban da Usyk ken Fury, tallo laeng a korona ti naglabananda ta naibabawi ken ni Usyk ti korona ti IBF gapu iti dina panangsango ken ni Daniel Dubois (24-2) a maysa laeng a Briton ken mandatory challenger.
Trump, nasentensiaan iti pannakakonbiktarna iti <i>hush money case</i>
Bayat ti pannakainterbiu ni Usyk kalpasan ti labanda ken Fury, inagaw ni Dubois ti mikropono ket dinawatna nga ag-rematch-da ken Usyk. Iti labanda idi Agosto 26, 2023, inatiw ni Usyk ni Dubois babaen ti knockout iti maikasiam a rikus.
Iti biang ni Usyk, pinatganna ti dawat ni Dubois a rematch. Makaammo itan dagiti promoter a mangurnos. (AST/Bannawag)
