Natakawan ti maysa a chaplain ti Philippine Coast Guard a rimmidep iti uneg ti kotsena gapu iti bannogna kalpasan ti panangannongna iti tallo a misa iti rabii ti Disimembre 24 iti Siudad ti Pasay.
Innaganan ni Col. Samuel Pabonita, hepe ti Pasay City Police, ti biktima a ni alias Lt. Alvin, 37, ken agnanaed iti Coast Guard Base iti Parola Delpan, Tondo, Manila.
Binigbig met ni Pabonita ti suspek a ni Alias Joseph, 20. Natiliw daytoy iti agarup 7:00 p.m. iti Maginhawa St., Malate, Manila idi Disiembre 25.
Segun iti imbestigasion, nakarikna ti biktima iti saguyepyep bayat ti panagawidna ket imparadana pickup truck-na iti igid ti Roxas Boulevard tapno aginana ken rumidep.
Kukua ti TVJ ti trademark nga “Eat Bulaga!”—Court of Appeals
Idi makariing iti alas 5:00 iti bigat ti Dis. 24, awanen ti smart watch a suotna, ti nangisit a tactical bag-na a naglaon iti kuarta nga agdagup iti P200,000, cellular phone, personal ID, ken ATM card.
Segun iti polisia, kalpasan a naireport ti insidente, naisayangkat ti follow up investigation, babaen ti panangrebiuda kadagiti CCTV footage ti lugar a nakapasamakan ti insidente a pakairamanan ti Barangay 76, 10, 11, 12, 13, 14, ken 26, a nangitunda iti pannakabigbig ken pannakaarestar ti suspek.
Naalada iti ikut ti suspek ti Huawei wristwatch ti biktima, Huawei cellular phone, P5,100 a paset ti natakaw a kuarta, nangisit a long-sleeved shirt, black and white a tsinelas, ken ti bisikleta nga inaramat ti suspek.
(Jean Fernando/Manila Bulletin)
