Dagiti artista kadagiti 10 a pelikula iti maika-50 a tawen ti MMFF a nagtitipon iti Malakanyang para iti Konsyerto sa Palasyo: para sa Pelikulang Pilipino idi Dis. 15, 2024. (Malacañang photo)

Ginutugot ni Presidente Ferdinand Marcos Jr. dagiti Filipino tapno suportaranda dagiti sangapulo a pelikula a paset ti 2024 Metro Manila Film Festival (MMFF) ta segun kenkuana, dagiti pelikula ita a tawen ket addaan “nabalitokan a pagwadan” a mangiparangarang iti istoria a Filipino

Iti maysa a video message  a naiparang iti screening dagiti pelikula ti MMF kadagiti pagsinean, kinuna ni Marcos a nagbalinen a paset ti kultura a Filipino ti nasao a festival.

“Ita a Paskua, agbida manen dagiti istoria ti pulitayo. Gapu daytoy iti espesial a selebrasion ti maika-50 a tawen ti Metro Manila Film Festival a paseten ti biag ken kulturatayo a kas Filipino,” kinunana.

“Agkakaduakayo a sangapamilia, agbabarkada, ket buyaenyo ti sangapulo a pelikula a ruknoy ti MMFF,” innayonna. Kinunana pay a dagiti 10 nga entry ita a tawen ket saan la a mangidiaya iti pagliwliwaan ngem ketdi pati adal iti biag.

Nasional

Kampania kontra pannakamanipular ti presio ti bagas, isayangkat ti DA

“Sigurado a mangipaay iti nabalitokan a liwliwa ken mangibati iti nabalitokan nga adal dagiti napipintas a pelikula a kasali ita iti Golden Year ti MMF,” kinunana pay.

Tinawen a maisaysayangkat ti MMFF a pannakaipabuya dagiti pelikula a Filipino kabayatan ti panawen ti Paskua. Maipabpabuya dagitoy kadagiti pagsinean iti entero a pagilian manipud Disiembre 25 agingga iti Enero 7. (Argyll Cyrus Geducos/MB)