Nasurok a 4,000 a pamilia, a buklen ti 14,000 a tao, ti kapilitan nangrambak iti Paskua iti 32 a pagbakuitan gapu iti agtultuloy a panagbettak ti Bulkan Kanlaon iti Negros Island.
Segun iti kaudian a datos ti National Disaster Risk Reduction and Management Council (NDRRMC), agdagup iti 2,680 a pamilia a buklen ti 8,434 a tao ti agtalinaed kadagiti 22 nga evacuation center iti Negros Occidental; idinto nga agdagup iti 1,757 a pamilia, wenno 5,819 a katao, ti adda iti 10 nga evacuation center iti Negros Oriental.
Ti nailian ken lokal a gobierno ti mangipapaay kadagiti kangrunaan a kasapulan dagiti nagbakuit, agraman ti pangtaraon ken pangsalaknib a bambanag manipud iti local security forces.
Ngem pinalagipan ti Department of Health (DOH) dagiti mangimatmaton kadagiti pagbakuitan nga agridamda koma kadagiti posible a food poisoning gapu iti di umisu a pannakaidulin dagiti taraon iti panawen ti Paskua.
Impeachment complaint kontra ken ni VP Sara Duterte, addan iti Senado
Iti agdama, nangisayangkat ti Task Force Kanlaon iti ocular inspection kadagiti lugar a mabalin a pangipanan kadagiti nagbakuit ken kitaenna dagiti kasapulan iti pagbakuitan, nga agkasapulan ita kadagiti portalets, diaper, ken dadduma pay a rekursos.
Iti sabali a bangir, agdagup iti 2,080 dagiti pamilia, a buklen ti 6,666 a katao, ti naipan iti pagbakuitan, ngem kaykayatda ti nagbati a kaduada dagiti kakabagianda iti Negros Occidental ken Negros Oriental. (Aaron Recuenco/Manila Bulletin//Lito Hilidon/Bannawag)
