Addan maala dagiti empleado ti gobierno a medical allowance kalpasan nga inaprobaran ti Department of Budget and Management (DBM) dagiti alagaden iti pannakaipaay iti PhP7,000 a medical allowance para iti 2025.
Inanamongan ni Sekretaria ti DBM Amenah Pangandaman ti Budget Circular 2024-6, a mangilawlawag iti pagannurotan, paglintegan ken regulasion iti pannakaipaay ti medical allowance.
Maitunos daytoy iti Executive Order (EO) 64 s. 2024, a nangipangato met iti sueldo dagiti agpapaay iti gobierno, a pinirmaan ni Presidente Ferdinand Marcos Jr. (PBBM) idi Agosto, 2, 2024.
Maited ti tinawen a medical allowance kadagiti kualipikado a sibilian nga empleado ti gobierno kas tulong iti panangalada iti health maintenance organization (HMO)-type a benepisioda.
Barbie Forteza ken Jak Roberto, nagsinan kalpasan ti pito a tawen
Sakupen ti sirkular ti DBM amin a sibilian nga empleado dagiti nailian nga ahensia ti gobierno agraman dagiti state universities and colleges (SUCs) ken government-owned and controlled corporations (GOCCs) a saan a nairaman iti Republic Act 10149 ken EO 150, s. 2021.
Nairaman met iti sirkular ti DBM dagiti empleado dagiti local government units (LGUs) ken local water district.
Mabalin a maikkan iti medical allowance dagiti amin nga agtrabtrabaho iti gobierno, regular, casual, wenno contractual; nabotosan wenno napusgan; uray dagiti agtrabtrabaho a full-time wenno part-time. (Darryl John Esguerra/PNA//Lito Hilidon/Bannawag)
