Kalpasan ti makatawen, inkeddengen ti Court of Appeals ti nainkalintegan nga agtagikua iti trademark nga "Eat Bulaga."
Pinasingkedan ti maikasiam a dibision ti appellate court ti pangngeddeng ti Marikina Regional Trial Court Branch 273 a da Tito Sotto, Vic Sotto ken Joey de Leon ti agtagikua iti trademark nga "Eat Bulaga."
Kinuna ti CA a saan a biddut ti immuna a desision maipapan iti panagtagikua iti paggugusto dagiti tao a noontime variety show.
Pinasingkedan pay ti CA nga agsungbat ti Television and Production Exponents (TAPE) iti saan a patas a kompetision ken panaglabsing iti copyright.
Barbie Forteza ken Jak Roberto, nagsinan kalpasan ti pito a tawen
Imbilin ti CA iti TAPE ken GMA nga isardengdan ti mangusar ti "Eat Bulaga" ken "EB."
Binilinna pay ti Intellectual Property Office of the Philippines a kanselarendan dagiti trademark registrations ti TAPE para iti “Eat Bulaga,” “EB,” ken ania man a kanaigna a logo.
Ti pangngeddeng, pinatalgedanna a "ti ekslusibo a karbengan dagiti sientista, imbentor, kasta met dagiti artista ken dagiti nasagudayan nga umili iti intelektual a sanikuada ken dagiti partuatda, ket masapul a masalakniban," ket sakupen dayta da Tito, Vic ken Joey, ken maysa kadagiti creatives ti EB a ni Jenny Ferre.
Iti laksid nga ammo ti TAPE a ni Joey ti nakapanunot iti nagan ti pabuya, kuna ti CA a saan a napudno ken nagkusit ti TAPE idi ipilitda ti panagtagikuada iti "Eat Bulaga" a trademark idi 2011.
Manamnama nga agapelar ti TAPE iti desision ti CA.
(Carissa Alcantara/Manila Bulletin)
