BAGUIO CITY— Nagpositibo ti uppat a drayber ti bus ken dua a konduktor iti surprise drug test nga insayangkat ti Philippine Drug Enforcement Agency-Cordillera idi Enero 2.
Segun ken ni Atty. Joshua Pablito, regional director ti Land Transportation Office (LTO)-Cordillera, agdalan iti confirmatory testing dagiti nagpositibo tapno maammuan no pudno nga agus-usar dagitoy iti ilegal a droga.
Naisayangkat ti drug test iti 98 a drayber ti bus ken van ken walo a konduktor iti uppat a bus terminal, a pakairamanan ti Gov. Pack Road terminal.
Kinuna ni Pablito a maikkan iti show cause order dagiti operator dagiti bus a pagtrabtrabahuan dagiti nagpositibo ken madusa wenno mamulta dagitoy no mapasingkedan a positibo dagitoy iti ilegal a droga.
Kapitan ti barangay iti Isabela, pinaltoganna ti maysa a mannalon
Innayon ni Pablito a naisayangkat ti drug test kas paset ti Oplan Ligtas Biyahe Pasko 2024 nga idauluan ti LTO tapno masigurado ti kinatalged dagiti agbiahe iti panawen ti bakasion.
(Zaldy Comanda/Manila Bulletin)
