Natay ti maysa a 25-anios a lalaki a mapapati a pinaltogan ti amana bayat ti nabara a panagririda iti Barangay San Guillermo, San Nicolas, Ilocos Norte idi agsapa ti Biernes, Disiembre 3.
Binigbig ni Police Capt. Randy Damo, hepe ti polisia ti San Nicolas, ti biktima a ni Jovanie Fer Cabbat idinto a ti suspek ket ni Fermin Cabbat Jr., 58, maysa a retirado a soldado.
Segun iti imbestigasion ti polisia, nakita ni Jovanie ti amana a mangpupuor kadagiti gamigam ti nanangna iti uneg ti balayda. Sinulong ni Jovanie ti rupa ti tatangna tapno mapasardengna daytoy.
Nakapungtot ti suspek ket innalana ti paltogna iti kuartona ket pinaputokanna ni Jovanie. Nagsagrap ti biktima iti adu a sugat ket naitaray iti ospital ngem naideklarar a natayen.
Kapitan ti barangay iti Isabela, pinaltoganna ti maysa a mannalon
Inarestar dagiti polis ni Fermin ken nakaalada iti lima a nagawangan a kapsula ti caliber 5.56, dua a magazine assemblies para iti caliber 5.56, ken dua a magazine assemblies para iti caliber 7.62 iti nakapasamakan ti pammaltog.
Kinuna ni Damo a sapsapulenda ti naaramat a paltog. Maipasango ni Fermin kadagiti maitutop a kaso. (Freddie Lazaro/MB)
