BAGUIO CITY – Inyalnag ti Baguio Flower Festival Foundation Inc. ken ti  gobierno ti siudad  ti 29th Panagbenga Festival wenno ti Baguio Flower Festival 2025 iti daytoy a siudad ita nga aldaw, Lunes, Enero 6, nga addaan iti tema a “Blossoms Beyond Boundaries.

Impakaammo da Mayor Benjamin Magalong ken BFFFI Chairman for Life Mauricio Domogan, kaduada ti BFFFI Board of Trustees, nga idauluan ni President Frederico Alquiros, ti agmaysa-a-bulan a kalendario dagiti aktibidad ti Panagbenga manipud iti Peb. 1 agingga iti Marso 2 bayat ti flag-raising ceremony iti city hall.

Nagpabuya ti Saint Louis University Glee Club and Marching Band ken ti  Center for Culture and the Arts bayat ti pannakayalnag ti Panagbenga.

Nakipaset dagiti mannala ti Saint Louis University Center for Culture and the Arts iti pannakayalnag ti Panagbenga Festival iti Baguio City iti daytoy nga aldaw, Lunes, Enero 6. (Zaldy Comanda)

Pormal a maluktan iti tunggal Pebrero 1 daytoy tinawen a parambak babaen ti panagsasalip dagiti street dancer ken drum and lyre band para iti puesto iti dua a grand parade—ti street dancing parade ken ti float parade.

Lokal

Kapitan ti barangay iti Isabela, pinaltoganna ti maysa a mannalon

Kinuna ni Alquiroz nga innayonda itoy a tawen ti college category para iti  street dancing ken drum and lyre  malaksid a naikadakkel dagiti premio itoy a tawen.

“Dagiti ekstraordinario a talento, karbenganda ti ekstraordinario a premio,” kinunana.  

Inkari ti BFFFI nga ad-adda pay a papintasenda ti parambak para iti pakalinglingayan dagiti tattao a di mauma a mangsupsuportar iti daytoy naidumduma a parambak iti Amianan a Luzon.

Kinuna ni Anthony de Leon, BFF Executive Committee chairman, a naikadakkel ti premio itoy a tawen, nangruna iti float competition. Dati a P500,000 ti grand prize ngem itoy a tawen, agbalinen a P700,000.

“Ti target-mi ket P1 milion para kadagiti sumarsaruno a tawen,” innayonna.

Kinuna ni Magalong nga isagsaganan ti polisia ti traffic plan para iti manamnama a yaadu dagiti motorista bayat dagiti kangrunaan nga aktibidad ti Panagbenga.

"Akuenmi a problema a talaga ti kinairut ti trapiko iti siudad, ngem namnamaenmi dayta, isu nga ar-aramidenmi ti amin tapno maleplepan daytoy, ta dimi met malapdan dagiti turista nga umay iti Baguio. Nasken laeng ti disiplina dagiti motorista bayat ti panawen ti parambak,” kinuna ni Magalong.  (Zaldy Comanda/ Manila Bulletin)