Mangrugi nga ipatungpal ti Philippine National Police (PNP) ti pannakaiparit ti panagimet iti paltog (gun ban) iti entero a pagilian inton Enero 12 kas paset ti security measure para iti Election 2025 inton Mayo 12.
Kinuna ti panakangiwat ti PNP a ni Brig. Gen. Jean Fajardo a nabayagen a paset ti natalged nga eleksion ti pannakaipatungpal ti gun ban, nangruna ta mangrugi ti panawen ti eleksion inton Enero 12.
Kinuna ni Fajardo nga ad-adalenda dagiti mangpatuad iti pangta iti seguridad, kas iti pribado nga armado a grupo ken ti nabara a panagririsiris iti politika.
Mainayon iti gun ban ti naiget nga operasion ti PNP maibusor kadagiti di nairehistro a paltog kasta met ti kampania kontra iti private armed groups (PAGs).
Impeachment complaint kontra ken ni VP Sara Duterte, addan iti Senado
Kinuna ni Fajardo nga impaulogen ti Commission on Elections (Comelec) ti maysa a resolusion a nangilaksid kadagiti polis, soldado, ken dadduma pay a pannakabalin ti linteg iti election gun ban.
Ngem adda pagannurotan a masapul a tungpalen tapno mailaksid iti gun ban, ta masapul a sikakawes iti umno nga uniporme ken adda iti oras iti trabahona.
Innayon ni Fajardo a naibilin kadagiti amin a yunit ti polis nga itultuloyda ti operasion maibusor kadagiti natda a PAGs iti pagilian.
Maibatay iti datos ti PNP, adda tallo a PAGs a bambantayanda - saggaysa iti Central Luzon, Central Visayas, ken Mindanao.
Manipud Enero agingga iti Nobiembre idi napan a tawen, nasamsam ti PNP ti nasurok a 25,000 a di nairehistro a paltog, idinto a nayawat ti 10,000 a paltog tapno maidulin.
Agdagup iti 8,628 a katao ti nakemmeg gapu iti panaglabsingda iti Republic Act 10591 wenno ti Comprehensive Firearms and Ammunition Regulation Act. (Aaron Recuenco/Manila Bulletin//Lito Hilidon/Bannawag)
