Inwaragawag ni Prime Minister ti Canada Justin Trudeau ti panaglusulosna ita nga aldaw, Enero 7 (Enero 6, 2025 iti Canada).
Segun ken ni Trudeau, kiniddawna iti presidente ti Liberal Party a partidona a rugiandan ti proseso iti panangpili iti baro a lider. Sangsanguen ni Trudeau ti kumarkaro a di pannakapnek iti panangidaulona, a dinegdegan ti kellaat a panagpanaw ti finance minister idi napan a tawen a nangipasimudaag iti dumakdakkel a riribuk iti ikub ti gobiernona.
Ni Trudeau ti maikadua a kaubingan a prime minister iti pakasaritaan ti Canada idi nabotosan idi 2015, ken planona ti agkandidato iti maikapat a termino iti eleksion inton sumaruno a tawen uray no dumakdakkel ti di pannakapnek iti partidona.
Sinublat ni Trudeau ti liderato idi 2015 kalpasan ti 10 a tawen a panagturay ti Conservative Party. Dinaydayawda idi rugrugina ti agturay gapu iti panangisublina iti pagilian iti liberal a napalabas daytoy. Ngem iti panaglabas ti tawen, saanen a magustuan dagiti botante ti 53-anios a lider nga anak ni Pierre Trudeau, maysa kadagiti kalatakan a prime minister ti Canada, gapu iti nadumaduma nga isyu a pakairamanan ti nangato a presio ti taraon ken pagbalayan, ken umad-adu nga imigrasion.
Pope Francis: T<b>i bullying kadagiti eskuela, isaganana dagiti estudiante para iti gubat, saan nga iti kappia </b>
Dagitoy a pakarikutan ti administrasion ni Trudeau, pinakaro pay ti panangipangta ni U.S. President-elect Donald Trump a mangyetnag iti 25% a taripa kadagiti amin a tagilako ti Canada no saan a lapdan ti gobierno ti ibagbaga ni Trump panagadu ti agus dagiti migrante ken droga iti U.S. (Associated Press)
