Naiget a bambantayan ti barko ti Philippine Coast Guard (PCG) a BRP Cabra (MMRV-4409) ti ilegal a kaadda ti barko ti China Coast Guard (CCG) nga uppat nga aldawen nga agdakdakiwas iti exclusive economic zone (EEZ) ti Filipinas.
Segun ken ni Commodore Jay Tarriela, panakangiwat ti PCG iti West Philippine Sea (WPS), ti barko a CCG-5901, wenno maaw-awagan iti "monster ship" gapu iti kadakkelna, ti adda iti 60-70 a nautical miles manipud iti aplaya ti Zambales.
Kas iti napalpalabas, binabalaw ti PCG ti kaadda ti CCG-5901 iti EEZ ti Filipinas ket impaganetgetda nga awan karbengan ti CCG-5901 a mangiwayat iti patrulia sadiay.
Kas sungbat ti China, binaonna ti helikopter ti People's Liberation Army-Navy a nagalimpayag iti ngato ti barko ti PCG.
Impeachment complaint kontra ken ni VP Sara Duterte, addan iti Senado
Kas sungbat ti PCG, nangipaulog ni Commandant Admiral Ronnie Gavan iti nalawag a panangiwanwan kadagiti taona tapno dida mabutbuteng ken liklikanda ti ania man a tignay a mabalin a mangpakaro iti risiris.
Naiget ti panagbantay ti BRP Cabra, Northern Luzon Command, ken dadduma pay a kakaduada manipud iti Area Task Force North ken iti National Task Force West Philippine Sea. (PNA//Lito Hilidon/Bannawag)
