Impakaammo ti Department of Education (DepEd) iti daytoy nga aldaw, Mierkoles, Enero 8, ti planona a mangsolbar iti 165,000 a kurang a klasrum babaen ti Public-Private Partnerships (PPPs), mangrugi iti target a 15,000 a klasrum a malpas agingga nga aggibus ti 2027.
Indatag ni Education Secretary Sonny Angara daytoy a plano ken ni Presidente Marcos bayat ti kaudian a miting iti Malakanyang, kas impakaammo ti DepEd.
Sakbayna, itay laeng Disiembre 2024, napirmaan ti Technical Assistance Agreement iti nagbaetan ti DepEd ken ti Public-Private Partnership (PPP) Center.
Inlawlawag ti DepEd a daytoy a gannuat iti babaen ti PPP School Infrastructure Project (PSIP 3), mapattapatta a P37.5-bilion agingga iti P60-bilion ti magasto ken mapan a 600,000 nga estudiante iti sibubukel a pagilian ti mabenepisiaran. Di met nakurkurang ngem 18,000 a tattao ti maipaayan iti trabaho iti babaen daytoy a proyekto.
LTO, inkarina nga addanton plaka dagiti amin a traysikel agingga iti Abril 30
“Dakkel a parikut ti kaadu ti pagkurkurangan a klasrum ngem patienmi a ti pannakitinnulong ti sektor pribado ti kasamayan a pangrisut iti daytoy,” kinuna ni Angara.
Innayonna a babaen dagiti sumaruno a PPP School Infrastructure Projects (PSP 4 ken 5), maileppasto pay ti 30,000 agingga iti 60,000 a klasrum.
Malaksid kadagiti nayon a klasrum, kuna ni Angara nga ikagumaanan pay ti DepEd ti mangipaay kadagiti eskuela publika iti elektrisidad ken kadagiti kasapulanda a gadget babaen ti PPPs.
Manamnama a mayalnag iti agtengnga ti 2026, ti plano a digitalization ken solarization dagiti eskuela ket inayonna ti pannakaipaay ti elektrisidad kadagiti eskuela nga adda kadagiti adayo a lugar, Low-Earth Orbit (LEO) satellite internet connectivity para kadagiti awanan access iti internet, ken laptop para kadagiti mannursuro.
Kuna ti DepEd a babaen ti kaadda ti internet connectivity kadagiti eskuela, manamnama ti ad-adda pay a kinaepektibo dagiti titser idinto a maipaayda met kadagiti estudianteda dagiti adu a pagtaudan ti adal a saanda a kabaelan a serken gapu iti kaawan ti internetda.
“Babaen ti panagtinnulong ti DepEd ken ti sektor pribado, manamnama ti pannakarisut ti panagkurang dagiti klasrum ken marangtayan ti ‘digital divide’ wenno kaawan ti internet connectivity a makatulong a mangpataud iti sistema ti edukasion a mangsango iti masakbayan a mangisagana met kadagiti estudiante tapno maaddanda iti trabaho apaman nga agturposda,” kinuna ni Angara. (Merlina Hernando-Malipot/ Manila Bulletin)
