Mangrugi ti gun ban iti sapasap a pagilian inton Enero 12, 2025, a panangrugi met ti election period para iti eleksion into Mayo 2025, segun iti Commission on Election.
“Isu a kadagiti kailiantayo, uray no lisensiadokayo nga agtagikua iti paltog ken addaankayo iti permit nga agimet iti paltog iti ruar ti pagtaenganyo, no awanankayo iti certificate of authority manipud iti COMELEC ket itugotyo dagiti paltogyo iti ruar, aglabsingkayo iti gun ban, iti Omnibus Election Code, ken iti Republic Act 7166,” kinuna ni Atty. John Rex Laudiangco, spokesman ti COMELEC, iti naglaok a Filipino ken Ingles kabayatan ti briefing ti Bagong Pilipinas.
"Maysa nga election offense daytoy ket mabalin a madusakayo iti maysa agingga iti innem a tawen a pannakabalud, pannakapukawyo iti karbenganyo nga agbotos, ken kangrunaanna, perpetual disqualification to hold public office,” innayonna.
Kiniddawna ti pannakitinnulong ti publiko, ken impakaammona nga idi napan a tawen, naipablaak iti website ti COMELEC ti maysa a resolusion ti COMELEC nga addaan iti banner para iti gun ban a nakailanadan dagiti amin nga impormasion maipapan iti gun ban, dagiti pagannurotan, ken no asino ti mabalin nga agaplikar iti certificate of authority.
LTO, inkarina nga addanton plaka dagiti amin a traysikel agingga iti Abril 30
Impalagip ni Laudiangco kadagiti kualipikado nga agaplayda sakbay a maipatungpal ti gun ban ta ti panagimet iti paltog iti ruar ti pagtaengan, uray pay no addaan iti lisensia, LTOPF, wenno permit nga agimet iti paltog iti ruar ti pagtaengan, no awan ti certificate of authority manipud iti Comelec, ket panaglabsing iti linteg.
Kinuna ni Laudiangco nga adda bileg dagiti pannakabagi ti linteg a mangisayangkat iti naun-uneg nga imbestigasion no adda nainkalintegan a rason ti panagsuspetsada. Impanamnamana ketdi nga amin dagitoy nga aramid, maitunos kadagiti pagannurotan ti COMELEC gun ban ken kadagiti protocol iti pannakaisayangkat ti checkpoint.
"Naigetkami iti daytoy gapu ta ti panggeptayo, malaksid iti pannakaisigurado ti naurnos nga eleksion, ket ti kinatalged dagiti umili nangruna dagiti kandidato ken botante," kinuna ni Laudiangco.
Innayonna a maipatungpal met ti nationwide checkpoint kabayatan ti election period.
(Dhel Nazario/Manila Bulletin)
