Nagawid ni Rufa Mae Quinto iti Filipinas tapno sumuko iti National Bureau of Investigation (NBI) gapu iti warrant of arrest a naipaulog kontra kenkuana gapu iti kaso a naipila kontra kenkuana iti korte ti Pasay.
Maibasar iti report ti GMA News, dimteng ni Rufa ken ti team-na iti parbangon ti Mierkoles, Enero 8, iti Ninoy Aquino International Airport (NAIA). Sadiay, agur-urayen dagiti pannakabagi ti NBI.
Iti interbiu, inlatak ni NBI Chief Jimmy De Leon, a kinontak ida ti abogado ni Rufa Mae para iti boluntario nga isusukona.
Agdalan nga umuna ni Quinto iti medico legal sakbay a maidatag iti korte ti Pasay.
LTO, inkarina nga addanton plaka dagiti amin a traysikel agingga iti Abril 30
Naidarum ti komediante iti kaso a kapada ti sangsanguen ni dati nga aktres Neri Naig Miranda—ti maipagarup a panaglabsingda iti Securities Regulations Code gapu iti panangyendorsoda iti "Dermacare."
Maipalagip a nangiruar idi ti Securities and Exchange Commission iti scam warning alert kontra iti lima a kompania a mangaw-awis iti publiko nga agpuonan ta dakkel ti maganansia. Maysa kadagitoy a negosio ti Dermacare.
Kuna ti SEC nga ilegal ti panangyendorso kadagitoy a produkto ta awanan dagitoy kadagiti kasapulan a lisensia ket maibilang daytoy a panaglabsing iti Securities Regulation Code (SRC) ken Financial Products and Services Consumer Protection Act.
Impetteng ni Rufa Mae a nakasagana a mangsango iti kaso, ken nadalus ti konsiensiana.
(Richard De Leon/Balita)
