Nakasaganan ti Siudad ti Manila a mangsaluad iti minilion a deboto a manamnama a tumabuno iti Traslacion ti Jesus Nazareno ita a tawen, segun iti gobierno lokal ita nga aldaw, Enero 8.
Babaen ti panagtitinnulong dagiti nadumaduma nga ahensia, kinuna ti lokal a gobierno a manamnama ti natalged ken naurnos a selebrasion.
Nadisenio ti panagsagana a mangtaming iti kaadu dagiti tumabuno, seguridad ken salun-at ti publiko, agraman ti naurnos a pannakaisayangkat ti libut.
Segun iti city government, ti seguridad ti kangrunaan a prioridad iti Traslacion 2025, isu a maibaon ti nasurok a 12,000 a polis manipud iti Manila Police District (MPD), ti Philippine National Police (PNP) - National Capital Region Police Office (NCRPO), ken dagiti kabangibang a police regional offices (PRO 4A, PRO 3).
Impeachment complaint kontra ken ni VP Sara Duterte, addan iti Senado
Mainayon ditoy ti puersa ti Armed Forces of the Philippines (AFP), ti Bureau of Fire Protection (BFP), ti Philippine Coast Guard, ken Bureau of Jail Management and Penology (BJMP).
Maipatungpal ti gun ban iti Manila manipud iti Enero 8 agingga iti 11; kasta met ti liquor ban kadagiti barangay nga asideg iti Quiapo manipud iti Enero 8 agingga iti 10.
Binalakadan ti City Health Department dagiti deboto nga agaruatda iti face mask ken agusarda iti alkohol tapno maliklikan ti pannakaimpektar itoy dakkel a panagtitipon.
Naipuesto ti sumagmamano a health team iti kangrunaan a lugar tapno napardas ti panarespondeda iti ania man a medikal nga emerhensia, ken tapno masigurado ti kinatalged ti publiko.
Kiniddaw ni Mayor Honey Lacuna-Pangan ti pannakitinnulong dagiti deboto kadagiti autoridad, ket tungpalenda koma dagiti pagannurotan iti kinatalged. (Diann Ivy C. Calucin/Manila Bulletin//Lito Hilidon/Bannawag)
