Immaboten iti 16 a trilion a pisos ti utang ti nasional a gobierno, segun iti datos manipud iti Bureau of the Treasury (BTr).
Ti panagbaba ti balor ti pisos no maidilig iti US dollar, agraman dagiti net financing activities, ti maitudo nga ad-adda a nangpadakkel iti utang ti gobierno.
Bimmaba ti pisos manipud PhP58.2 ti maysa a doliar iti ngudo ti Oktubre 2024 agingga iti PhP58.60 iti ngudo ti Nobiembre 2024.
Segun pay iti BTr, agdagup ti outstanding debt ti gobierno iti PhP16.09 a trilion manipud iti ngudo ti Nobiembre 2024. Mapan a 0.4 a porsiento wenno PhP70.70 a bilion ti ngimmatuanna manipud iti ngudo ti Oktubre 2024.
LTO, inkarina nga addanton plaka dagiti amin a traysikel agingga iti Abril 30
Iti ngudo ti Nobiembre, dimmanon met ti domestic debt iti PhP10.92-trilion, mapan a 0.3 a porsiento wenno PhP31.82 bilion a nangatngato ngem iti ngudo ti Oktubre 2024.
Maigapu daytoy a panagngato iti PhP30.67-bilion a net issuance ti domestic securities ken ti PhP1.15-bilion nga epekto ti panagbaba ti balor ti pisos iti domdominaren ti US dollar a domestic debt.
Iti domestiko nga agpang, ngimmato ti utang ti gobierno iti 9 a porsiento wenno PhP903.73 bilion no idilig iti ngudo ti Disiembre 2023.
Kabayatanna, ngimmato met ti utang iti ganggannaet iti 0.8 a porsiento wenno PhP5.17 a trilion manipud iti ngudo ti Oktubre 2024.
Ti panagbaba ti balor ti pisos ti nangipangato iti PhP35.61-bilion iti lokal a balor ti utang a domdominaren ti US dollar, idinto a nainayon ti P8.33 billion a net foreign loan borrowings. (Derco Rosal/Manila Bulletin)
