Mapan a 7.4 a milion ti deboto a timmabuno iti "Traslacion" ita a tawen a naangay iti Siudad ti Manila itay Huebes, Enero 9, a naggibus kalpasan ti 20 nga oras ken 45 a minuto, ngem "natalna" ken "naurnos" ti pakabuklan ti Piesta ti Jesus Nazareno, segun iti paliiw ti Philippine National Police (PNP).
Gapu itoy, dinayaw ni Police General Rommel Francisco Marbil, hepe ti PNP, ti publiko iti kooperasionda kadagiti autoridad, ken dagiti polis a nagbantay iti pasken, ta nagleppas ti dakkel a narelihiosoan a piesta nga awan ti dakes a napasamak.
Ti Traslacion, wenno ti panaglibut ti rebulto ti Jesus Nazareno manipud iti Quirino Grandstand agingga iti Quiapo Church, ket nangrugi iti 4:40 iti parbangon ti Enero 9 ket nagleppas itay 1:25 iti parbangon ti Enero 10, segun iti PNP.
Kinuna ni Marbil nga adda sumagmamano a risiris a napataud iti libut idi pinadas dagiti dadduma a deboto a layawen dagiti barikada, ngem nagtignay a dagus dagiti opisial ti PNP ket napagtalnada met laeng ti situasion.
Impeachment complaint kontra ken ni VP Sara Duterte, addan iti Senado
Maibatay iti datos ti Philippine Red Cross, adda 1,300 a a tao a naipakaammo a nadangran bassit, a kaaduan kadagitoy ket sugat dagiti deboto bayat ti nakaro a panangiduron ken panangguyod dagiti kayatda a sagiden ti imahe ni Jesus Nazareno, kasta met dagiti naulaw ken naawanan ti puot iti tengnga ti libut.
Iti laksid dagitoy, dinayaw ni Marbil ti koordinasion ti gobierno ti Manila City, ti Catholic Church, ken dagiti gunglo a nagboluntario para iti balligi ti pasken.
Binigbig ni Marbil ti panagsakripisio dagiti opisial ti PNP tapno masigurado a natalna ken natalged ti panangyebkas dagiti minilion a deboto iti pammatida. (Martin Sadongdong/Manila Bulletin//Lito Hilidon/Bannawag)
