Inlawlawag ni Albay 2nd district Rep. Joey Salceda nga awan ti asino man a nangpilit wenno nangimpluensia kenkuana tapno idatagna iti Kamara ti baro a franchise application para iti panagsubli ti dati a television ken radio giant ABS-CBN.
"Agpayso ti kuna ti ABS-CBN a dida kiniddaw kaniak tapno ipilak ti prangkisa. Uray ti liderato ti Kamara, saanda a kiniddaw dayta kaniak. Inaramidko laeng daytoy gapu ta patiek a daytoy ti umno,” kinuna ni Salceda iti pakaammona iti daytoy nga aldaw, Biernes, Enero 10.
Impila ni Salceda ti House Bill No. 11252 nga agkidkiddaw iti baro a 25-tawen a prangkisa para iti maaw-awagan iti “Kapamilya network.”
Nagpaso ti prangkisa ti ABS-CBN idi Mayo 4, 2020, idi panawen ni Presidente Duterte.
LTO, inkarina nga addanton plaka dagiti amin a traysikel agingga iti Abril 30
"Nagpaayak idi a co-author ti ABS-CBN franchise idi pay 2019. Ngem pagdaksanna, saanak idi a kameng ti Committee on Legislative Franchises. Nupay kasta, nakipartisiparak iti diskusion babaen ti panangiballaagko idi a ti pannakaiserra ti ABS-CBN, ibungana ti ad-adu pay nga agsakit iti COVID-19 gapu iti kinakurang ti maidanon kadakuada nga impormasion,” kinuna ni Salceda.
"Iti daytoy a Kongreso, napanunotko a ti kasayaatan a wagas a pannakipartisiparko iti daytoy a diskusion ket isu ti panagbalinko a kangrunaan nga autor ti gakat. Imbasarko ti desisionko iti tallo a banag,” innayonna.
“Umuna, adda iti rekord ti 18th Congress ti panangipaneknek ti BIR nga awan utang a buis ti network. Maikadua, kinuna ti Securities and Exchange Commission nga awan naidatag kadakuada a kaso maipanggep iti maatap a kaadda dagiti ganggannaet a makipagtagikua iti network. Maikatlo, impaulogtayo ti naamendaran a Public Service Act and Foreign Investment Act kalpasan a di naaprobaran ti pannakapabaro ti prangkisa ti ABC-CBN. Dagitoy a paglintegan, umdasdan a pagbatayantayo a mangrepaso ken mangatur kadagiti pakaseknan ti pannakipagtagikua dagiti ganggannaet,” kinunana.
"No addanto pay dagiti sabsabali a pakaseknan maipanggep iti network, wenno dagiti maatap a nagbasolan ti network a nasken a mapagsasaritaan, ti Congressional hearing ti maikanadto a forum,” innayon ni Salceda. (Ellson Quismorio/ Manila Bulletin)
