Saan a gagangay ti nagan a Pepsi Paloma iti pakasaritaan ti pop culture ti Filipinas. Nabaknang iti pakasaritaan ti biagna a nayabel iti trahedia ken nabalkut iti burburtia.
Naipasngay idi dekada 1960, naglatak ni Pepsi iti laingna a sumala ken kas aktres. Dagitoy a talugadingna ken ti napigsa a karismana ti nangawis kadagiti agbuybuya.
Nupay kasta, iti baet ti kinarimat ken kinapintasna, aglemlemmeng ti maysa a biag a dinadael dagiti bukodna a parikut ken kontrobersia, agraman ti nasapa nga ipapatayna.
Daytoy a nakakalkaldaang nga ipapatayna, pinaunegna laeng ti intriga a nangbalkut iti pakasaritaanna. Nangibati daytoy iti adu a saludsod a di masungbatan, nga ad-adda a nangnayon iti misterio iti komplikado a kinataona.
PNP, mangbukel iti puersa a mangkemmeg kadagiti polis a nairaman iti panangabbong iti nasamsam a droga idi 2022
Ti biag ni Pepsi, nagtalinaed iti panunot dagiti fans ken eskolar—a mangipakita iti nasipnget a paset ti kinalatak ken ti apagbiit a kinarimat iti napartak ti panagbaliwna a kultura.
Naipasngay idi Marso 11, 1966 (IMDb), ni Delia Duenas Smith, ad-adda nga am-ammo iti naganna iti entablado a Pepsi. Isu ti inauna iti uppat nga agkakabsat.
Pinadakkel ida ti single parent nga inada a ni Lydia Duenas, a tubo iti Samar, iti nanumo a pagtaengan.
Pinanawan ida ti amada a ni Kenneth Smith, maysa a kartero nga Amerikano, idi ubbingda pay ket nagmaymaysa ti inada a nangpadakkel kadakuada.
Idi 1980, naam-ammo ni Pepsi ni Tita Ester a nangtulong kenkuana a simrek iti entertainment industry.
Babaen ken ni Tita Ester, naam-ammo ni Pepsi ni Rey de la Cruz, maysa a dati nga optometrist. Mabigbigbig a talent scout ni Rey. Adu dagiti talent a tinulonganna a limmatak. Mairaman ditan da Rio Locsin ken Myrna Castillo.
Iti dayta met laeng a tawen (1980), nagbalin a daring ni Pepsi, nga agtawen pay laeng idi iti 14, iti pelikula a Brown Emmanuelle nga indirehe ni Celso Ad. Castillo. Kalpasanna, nagparang kadagiti dadduma pay a seksi a pelikula, kas iti Virgin People ken Naked Island a nairuar idi 1984.
Idi 1982, nagparang da Pepsi ken ti padana a seksi star a ni Guada Guarin kas guest iti nalatak a comedy series nga Iskul Bukol ket sadiay a naam-ammoda da Vic Sotto, Joey De Leon, ken Richie D' Horsie.
Maipagarup a minolestia dagiti tallo da Pepsi ken Guada. Kasta ti kuna dagiti report.
Imbaga ni Pepsi, nga agtawen idin iti 15, a rinamesda ket nangipila iti reklamo maibusor kadagiti tallo. Nupay kasta, insanudna ti kaso.
Maysa a parupa a damag ti rimmuar iti Sept. 29, 1982 nga isyu ti pagiwarnak a Tempo. Napauluan daytoy iti: "No rape, says Pepsi."
"Saanak a narames," naadaw iti kinuna ni Pepsi iti artikulo iti Tempo. "Addada tattao a mayat a maaddaan iti kuarta."
Manipud idi, nagtultuloyen dagiti kontrobersia a mangal-alia ken ni Pepsi. Kinuna dagiti report a nagbalin a desperado ti aktres. Tawen ti napalabas, kinuna dagiti report a kasla masaksakit ni Pepsi idi nagsubli ken ni Rey. Naitaray iti ospital.
Pimmusay ni Pepsi idi Mayo 31, 1985. Nagbekkel. Agtawen idi iti 19.
Uppat a pulo a tawen ti napalabas, nag-trending manen ni Pepsi kalpasan a nairuar ti teaser ti pelikula a The Rapists of Pepsi Paloma, nga indirehe ni Darryl Yap.
Idi Huebes, Enero 9, 2025, nangipila ni Vic Sotto iti cyber libel complaint kontra ken ni Darryl gapu iti trailer ti pelikula maipapan ken ni Pepsi.
Nineteen (19) counts a cyber libel ti impila da Vic ken ti abogadona iti Muntinlupa Regional Trial Court. Agkidkidawda iti moral damages nga agdagup iti P20 million ken exemplary damages a P15 million.
(Robert Requintina/Manila Bulletin)
