Nasentensiaan ni President-elect Donald Trump idi Biernes, Enero 10 (oras iti US) iti kasona iti hush money, ngem saan ketdi a nangyetnag ti hues iti ania man a dusa, maysa a wagas nga idinto a napasingkedan ti pannakakonbiktarna, nawaya a makasubli iti White House a saan a mabalud wenno mamulta.
Mabalin koma a sinentensiaan ni Manhattan Judge Juan M. Merchan ni Trump, 78, iti agingga iti uppat a tawen a pannakaibalud. Ngem pinili ti hues ti panangsentensia a nangliklik kadagiti narikut a konstitusional nga isyu babaen ti panangleppasnan iti kaso nupay impasiguradona nga agbalin ni Trump nga umuna a tao a nasentensiaan iti felony kasakbayan la unay ti panagtakemna kas presidente.
Saan a kas iti pannakabistana idi napan a tawen, idi nangyeg ni Trump kadagiti kaaliadona iti korte ken nagsao kadagiti agur-uray a reporter iti ruar ti korte, saan a personal a nagparang ni Trump idi Biernes, ket nagpakita laeng babaen ti virtual appearance manipud iti pagtaenganna idiay Palm Beach, Florida.
Nagparang ni Trump, a nakasuot iti natayengteng a terno ken nakatugaw iti abay ti maysa kadagiti abogadona, nga adda bandera ti Amerika iti likudanda, iti video screen, kabayatan nga impapilitna manen a saan isuna a nakaaramid iti krimen.
10,000 a pasdek, nauram iti wildfire iti LA
“Maysa daytoy a political witch hunt. Naaramid daytoy tapno madadael ti reputasionko tapno maabakak iti eleksion, ket nalawag, saan a nagballigi dayta a panggep,” kinuna ni Trump.
Inawagan ni Trump ti kaso a kas “weaponization of government” ken “pakaibabainan ti New York.”
Impatingga ti sentensia ken ni Trump ti pannakaidarumna iti 34 a felonies, a nabista iti dandani dua a bulan ken kinonbiktaran ti jury a kas sibabasol iti tunggal count (34). Nupay kasta, saan a nakadangran iti kenkuana daytoy, kadagiti botante a nangibotos kenkuana iti maikadua a termino.
Kinuna ni Merchan a naikonsiderar iti pangngeddengna ti legal a proteksion a masagrapto ni Trump a kas presidente. Nupay kasta, kinunana ketdi nga iti laksid ti "naisangsangayan a kasaknap ti sakupen dagita a legal a proteksion, saanda a kabaelan a marubsi ti pangngeddeng ti jury."
Ti hush money case a nakaidaruman ni Trump ket nagramut iti panangilingedna kadagiti rekord ti negosiona tapno malingdan ti $130,000 nga imbayadna ken ni porn actor Stormy Daniels. Nabayadan ni Daniels idi arinunos ti kampania ni Trump idi 2016 tapno saanna nga ibaga iti publiko ti maipapan iti seksual nga enkuentroda a dua maysa a dekadan ti napalabas. Kinuna met ni Trump nga awan ti seksual a napasamak iti nagbaetanda ken Daniels, ket inkalinteganna a dagiti politikal a kabusorna ti nangbukel iti bogus a prosekusion tapno dadaelenda isuna.
Inkagumaan dagiti abogado ni Trump a lapdan ti pannakabistana. Manipud idi kinonbiktaran ti jury idi Mayo 2024 iti 34 a count ti panangpalsipikar kadagiti rekord ti negosio, agarup inaramatda amin a legal a panglakagan tapno padasenda a baliktaden ti pannakakonbiktar ni Trump, wenno ma-dissmis ti kaso, wenno maitantan ti pannakasentensiana.
Kanayon met nga itantan ni Merchan ti pannakasentensiana, nga idi damo ket naikeddeng idi Hulio 2024. Ngem itay napan a lawas, inkeddeng ni Merchan ti Enero 10 tapno maipinalen ti kaso. Kinunana nga inkagumaanna a binalanse ti banag a masapul nga agturay ni Trump kas presidente, kasta met ti immunity ruling ti Korte Suprema, ken ti panangraem iti pangngeddeng ti jury ken iti ekspektasion ti publiko a "no one is above the law.”
Inkamakam met dagiti abogado ni Trump ti agsasaruno a panangireggetda kadagiti maudi nga or-oras tapno malapdan ti pannakasentensiana. Ngem napukaw ti maudi a namnamada idi rabii ti Huebes, Enero 9, gapu iti 5-4 a desision ti Korte Suprema a nagkedked a mangitantan iti pannakasentensia ni Trump. (Associated Press)
