Nasurok a 700,000 a kameng ken mangsupsuportar iti Iglesia ni Cristo (INC) ti napan iti Quirino Grandstand iti Manila ita nga aldaw, Enero 13, tapno agkiddaw iti panagturay ti talna ken panagkaykaysa iti pagilian.
Nangrugi a naguummong dagiti ag-rally idi Domingo, Enero 12, tapno maliklikan ti pannakasinga ti trapiko a gapuanan ti pannakaiserra dagiti kalsada bayat ti panagsaganada iti taripnong.
Adu ti nangipatakder iti tolda iti aglawlaw ti Quirino Grandstand idinto a nagdagus dagiti dadduma kadagiti asideg a hotel.
Itay 9:00 iti agsapa itoy nga aldaw, impakaammo ti autoridad nga addan 701,145 a katao ti simmangpet, ken adu pay ti sumaruno iti uneg daytoy nga aldaw.
PNP, mangbukel iti puersa a mangkemmeg kadagiti polis a nairaman iti panangabbong iti nasamsam a droga idi 2022
Impaganetget ti INC a ti panagtitipon ti agpaay a kas nabileg a panagkiddawda iti panagmaymaysa ken panangilaksid iti politikal a panagsisina para iti panagari ti urnos ken talna.
Mangrugi ti opisial a programa inton 4:00 iti malem agingga iti 6:00 iti rabii. (Diann Ivy C. Calucin/Manila Bulletin//Bannawag)
