Pinatgan ti korte ti Muntinlupa City ti mosion ni Darryl Yap ket nangipaulog iti pammilin a mangiparit ken ni Vic Sotto a mangibutaktak ken mangdakamat iti publiko ti linaon ti maidatag a sungbat ni Yap mainaig iti pelikulana a “The Rapists of Pepsi Paloma.”
Inruar ni Judge Liezel Aquiatan, Presiding Judge ti Muntinlupa Regional Trial Court Branch 205, ti pammilin ita nga aldaw, Enero 13, a nanganamong iti mosion ni Yap a maipaulog koma ti gag order, wenno ti pammilin a mangiparit iti panangiwaras iti impormasion wenno panagkomento mainaig iti kaso a naidatagen iti korte.
Pinaritan ti Muntinlupa City ni Sotto, ken asino man a mangibagi iti biangna, a mangipalnad wenno mangisawang iti publiko iti linaon ti sungbat nga idatag ti partido ni Yap, agraman amin a banag a rummuar iti pannakabista ti kaso.
Pinatgan pay ti korte ti mosion nga impila ni Atty. Raymund Fortun, abogado ni Yap, a mayakar ti aldaw a pannakabista ti writ of habeas data inton Enero 17.
Presidente Marcos, nagbilin iti DOH
Pinaritan ni Aquiatan da Yap ken Sotto a mangipalnad iti publiko iti mainaig iti kaso ti writ of habeas data, kas mayannurot iti sub judice rule, a mangsigurado a saan a maipakaammo iti publiko ti ania man a banag mainaig iti kaso agingga a saan a maresolba daytoy.
Naipaulog ti pammilin manipud iti petision a writ of habeas data nga indatag ni Sotto idi Enero 7 mainiag iti movie teaser ti “The Rapists of Pepsi Paloma” a nangdakamat iti nagan ni Sotto.
Babaen daytoy a petision, kiniddaw ni Sotto iti Muntinlupa RTC a maikkat koma ti teaser video ken promotional materials ti pelikula a nangdakamat iti sensitibo a personal nga impormasion ni Sotto.
Naibilin met ken ni Sotto nga ipilana ti sungbatna iti Motion for Consolidation nga indatag ti kampo ni Yap iti las-ud ti tallo nga aldaw manipud pannakaawatda iti pammilin ti korte.
Idi Enero 9, indarum ni Sotto ni Yap iti 19 a kaso ti cyberlibel kalpasan a madakamat ti nagan ni Sotto iti teaser video ti “The Rapists of Pepsi Paloma" nga indirehe ni Yap ken naikeddeng a maipabuya inton Pebrero. (Jonathan Hicap/Manila Bulletin//Lito Hilidon/Bannawag)
