Saan a pinatgan ti Pasig City Regional Trial Court (RTC) ti kiddaw ni daulo ti Kingdom of Jesus Christ (KOJC) Apollo Quiboloy a makipaset iti maysa a live television interview maipapan iti panangipilana iti certificate of candidacy (COC) kas senador iti umay nga eleksion.
Iti pangngeddeng nga impaulog ti Pasig Regional Trial Court (RTC) Branch 159 itay Enero 13, saan a napatgan ti kiddaw ni Quiboloy, ket kinuna ti korte a di rumbeng a makipaset ni Quiboloy iti interbiu gapu ta mabalin a dakamatenna dagiti merito ti kasona, a makaapektar iti panangkita ti publiko no kasano ti panangtaming ti korte iti daytoy a banag.
Segun iti pangngeddeng ti Pasig City RTC, ammo ti Korte ti legal a pagbanagan ken peggad a nainaig iti ania man a maisawang ni Quiboloy iti publiko bayat iti interbiu. Ania man a panangdiskutir iti merito ti kaso a kriminal wenno komentario a mabalin a mangimpluensia iti kapanunotan ti publiko iti hudikatura wenno iti maar-aramid a pannakabista, ket mabalin a mangdadael iti kinatarnaw ken kinalinteg ti proseso ti hustisia. Nangruna ket saan a maiturayan wenno mabantayan ti Korte ti live broadcast.
Nupay bigbigen ti Korte ti kalintegan ni Quiboloy nga agkandidato ken makipaset iti nainkalintegan a panagkampania, inlawlawag ti Korte a saan nga absolute daytoy.
PNP, mangbukel iti puersa a mangkemmeg kadagiti polis a nairaman iti panangabbong iti nasamsam a droga idi 2022
Naidarum ni Quiboloy iti Filipinas iti kaso a qualified human trafficking ken child abuse - a di mapiansaan a kaso. Iti met Estados Unidos, naidarum ni Quiboloy iti kaso a sex trafficking by force, fraud, and coercion; conspiracy; ken bulk cash smuggling.
Impila ni Quiboloy ti kandidaturana kas senador babaen ti abogadona a ni Mark Tolentino idi Oktubre 2024. (Richielyn Canlas/Manila Bulletin//Lito Hilidon/Bannawag)
