Umariwekwek a tao ti immatendar iti "National Rally for Peace” nga insayangkat ti Iglesia ni Cristo (INC) iti Quirino Grandstand, Rizal Park, Manila idi Lunes, Enero 13.
Maibatay iti datos ti Manila Disaster Risk Reduction Office (DRRMO) mapanen a 1.5 a milion ti tao iti Quirino Grandstand sakbay pay a mangrugi ti programa.
Segun iti Office of Civil Defense (OCD) a nangbantay iti pasken, naannayas ti naaramid a rally.
Segun iti INC, inangayda ti peace rally kas panangipeksada iti suportada iti kinuna ni Presidente Ferdinand Marcos Jr. a dina anamongan ti impeachment ni Bise Presidente Sara Duterte. Ingganetgetda met a saan a politikal nga addang ti rally.
PNP, mangbukel iti puersa a mangkemmeg kadagiti polis a nairaman iti panangabbong iti nasamsam a droga idi 2022
Sangsanguen ita ni Duterte ti tallo nga impeachment complaint gapu iti maipagarup a di umno a pannakausar ti pondo, banag nga inlibak met ti bise presidente.
Nagkadua da Marcos ken Duterte iti sidong ti "Uniteam" idi eleksion 2022, ngem nagsinada gapu iti nabara a sinnupiat iti politika. Idi Nobiembre ti napan a tawen, imbaga ni Duterte nga addan nakatulagna a tao a mangpapatay kada Marcos, First Lady Liza Marcos, ken House Speaker Martin Romualdez, no bilang ta adda mangpapatay kenkuana.
Iti maysa a video message idi kalman, Enero 13, nagyaman ni Duterte iti INC gapu iti panangisayangkatda iti rally, ket kinunana a kasapulan ti "panagkaykaysa" iti baet ti adu a sagsagabaen ti pagilian.
Nagyaman met ni dati a presidente Rodrigo Duterte ken ni Eduardo Manalo, Executive Minister ti INC, gapu iti panangisayangkatda iti nasao a rally.
Iti Siudad ti Davao, nasurok a 1,000 a kameng ti Maisug Group a konektado kadagiti Duterte ti dimmar-ay iti naangay a rally iti Rizal Park sadiay nga insayangkat met laeng ti INC. (Manila Bulletin//Lito Hilidon/Bannawag)
