Naideklarar a bakante ti posision a kas daulo ti Committee on Appropriations - maysa kadagiti kabilgan a posision iti Kamara - iti plenario itay Enero 13.
Ni Diputado ti Ako Bicol Party-list Zaldy Co. ti agpapaay a daulo ti nasao a komite sipud nangrugi ti maika-19 a Kongreso idi 2022.
Segun ken ni Co itay Enero 13, inkeddengna nga aglusulosen a kas daulo ti Committee on Appropriations gapu iti parikut iti salun-atna.
Nagyaman ni Co kadagiti kakaduana iti mayoria iti Kamara iti panangawatda iti panaglusulosna.
PNP, mangbukel iti puersa a mangkemmeg kadagiti polis a nairaman iti panangabbong iti nasamsam a droga idi 2022
Bayat ti panagakem ni Co, inisponsoranna ti nailian a badiet idi 2023, 2024, ken 2025. Inkalinteganna pay ti Ayuda para sa Kapos ang Kita Program (AKAP) ti Department of Social Welfare and Development (DSWD) iti nailian a badiet ita a tawen.
Agingga ita, awan pay ti diputado a napusgan a mangsukat ken ni Co. (Ellson Quismorio/Manila Bulletin//Lito Hilidon/Bannawag)
