Binilin ni Presidente Marcos Jr. ni Sekretario ti Department of Health (DOH) Teodoro Herbosa a siguraduenna ti agtultuloy a pannakaipaay ti serbisio ti Philippine Health Insurance Corporation (PhilHealth).
Daytoy ti imbilin ni Presidente Marcos iti naangay a taripnong dagiti kameng ti gabinete iti Malakanyang itay Enero 14, ket impaganetgetna a di rumbeng a maapektaran ti pannakaipaay ti serbisio medikal gapu iti kaawan ti pondo (zero subsidy) ti PhilHealth manipud iti nailian a badiet para iti 2025.
Iti pannakapirma ti nailian a badiet para iti 2025 idi Disiembre ti napan a tawen, impasigurado ti Presidente nga agtultuloy latta ti PhilHealth a mangipaay iti serbisio medikal nupay awan maalada a pondo.
Impaganetget ni Marcos ti panggep ti administrasion a mangipangpangruna kadagiti serbisio para iti kagimongan kas iti edukasion, salun-at, serbisio ekonomiko, impraestruktura, ken agrikultura. (Betheena Unite/Manila Bulletin//Lito Hilidon/Bannawag)
