Maysa a mannalon ti nasugatan iti panangpaltog kenkuana ti maysa a kapitan ti barangay iti Brgy. Santa Isabel Sur, Siudad ti Ilagan, Isabela, idi rabii ti Lunes, Enero 13.
Innaganan ti polisia ti biktima a kas Jon Jon.
Iti pakauna nga imbestigasion ti polisia, naammuan nga agpada a nakainum ti suspek, nga agnagan iti Rey, kapitan ti Brgy. Santa Isabel Sur, ken ti biktima, iti maysa a birthday party idi agsinnungbatda. Pimmanaw ti kapitan ti barangay ket idi agsubli, addan iggemna a paltog ket pinaltoganna ti ulo ti biktima. Naitaray ti biktima iti ospital idinto a naglibas a pimmanaw ti pimmaltog.
Ti ospital a nakaitarayan ti biktima ti nangireport iti polisia iti napasamak a pammaltog. Iti pannakaisursurat daytoy, adda iti kritikal a kondision ti biktima.
Ilocos Sur, agladladingit iti ipupusay ni DV Savellano, dati a gobernador ti probinsia
Simmuko ti suspek ken ni Mayor Jay Diaz ti Ilagan idi kalman, Enero 14. Adda metten ti suspek iti kustodia ti polisia.
Mapilaan ni Rey iti kaso a frustrated murder, kas kinuna ni case officer Police Master Sgt. Marck Denis Calimbo. (Liezle Basa Iñigo/ Manila Bulletin)
