Impasigurado ti Department of Justice (DOJ) itay Enero 14 nga itultuloyda ti panagimbestigarda ken ni Bise Presidente (BP) Sara Duterte iti laksid ti "panangipakita ti suporta" ti Iglesia Ni Cristo (INC) iti takder ni Presidente Ferdinand Marcos Jr. kontra iti impeachment daytoy.
Daytoy ti kinuna ni Sekretario ti DOJ Crispin C. Remulla kalpasan ti National Rally for Peace nga insayangkat ti INC idi Lunes, Enero 13, a patien dagiti adu a panangipakita ti INC iti panangsupiatda iti impeachment ni BP Duterte.
Tallo nga impeachment complaint kontra ken ni BP Duterte ti naipila iti Kamara.
Im-imbestigaren ti National Bureau of Investigation (NBI) ti press conference nga insayangkat ni BP Duterte idi Nobiembre ti napan a tawen a nangisawanganna nga adda binillinna a tao a mangpapatay kada Presidente Marcos, First Lady Liza Araneta Marcos, ken House Speaker Martin Romualdez, no bilang adda mangpapatay kenkuana.
PNP, mangbukel iti puersa a mangkemmeg kadagiti polis a nairaman iti panangabbong iti nasamsam a droga idi 2022
Kinuna ni Remulla a saan a maimpluensiaan ti impakita a suportar ti INC ti imbestigasion nga iwayat ti DOJ ta masapul a kitaenda ti linteg a mamagpapada iti nagbabaetan ti amin nga umili.
Kinuna ni Remulla a dina pakaseknan ti nailian a rally ti INC ta kalinteganda met daytoy.
Segun ken ni Prosecutor General Richard Anthony D. Fadullon nalpasen ti panagimbestigar ti NBI iti "pangta" nga impatangatang ni BP Duterte. (Jeffrey Damicog/Manila Bulletin//Lito Hilidon/Bannawag)
