Imbilin ni Gen. Rommel Francisco Marbil, hepe ti Philippine National Police (PNP), ti pannakabukel ti sepcial task force a mangkemmeg kadagiti retirado ken aktibo a polis, agraman dua a retirado a heneral, a sakup ti arrest warrant nga impaulog ti Manila Regional Trial Court (RTC) mainaig iti maipagarup a panangabbong iti nasamsam a shabu idi 2022 nga agbalor iti agarup PhP6.7 a bilion.
Pinusgan ni Marbil ni Police Lt. Gen. Edgar Alan O. Okubo, ti Chief of Directorial Staff ti PNP, a mangidaulo iti pannakabukel ti puersa a nairanta a mangipatungpal iti nasao nga arrest warrant.
Manipud iti 30 a tao a nainaganan iti arrest warrant nga impaulog ni Judge Gwyn Calina ti Manila RTC Branch 44, 22 kadakuada ti aktibo pay laeng iti serbisio, dua ti nagretiro, tallo ti nasapa a nagretiro, ken maysa ti naglusulosen iti serbisio.
Dagiti retirado a heneral a nadakamat iti arrest warrant ket da Benjamin delos Santos, dati a maikatlo a Deputy Chief of Operations ti PNP, ken Narciso Domingo, ti daulo ti PNP-Drug Enforcement Group.
Panagimbestigar ti NBI iti pangta ni BP Duterte, agtuloy iti laksid ti suporta ti INC
Sakbay a naipaulog ti arrest warrant itay Enero 14, imbilinen ni Marbil a maipan dagiti 22 nga aktibo a polis iti restrictive custody ti PNP.
Ti task force a mabukel ket agpaay kadagiti nagretiron wenno naglusulos, wenno aktibo pay lang iti serbisio a sumukir iti bilin a maipanda iti restrictive custody.
Kinuna ni Marbil a maipila ti administratibo a kaso kadagiti nadakamat a polis, ket siguraduenna a maipatay ti maitutop a dusa, agraman pannakaikkatda iti serbisio, ket awatenda ti maitutop iti inaramidda kas sagudayen ti linteg. (Aaron Recuenco/Manila Bulletin//Lito Hilidon/Bannawag)
