Inaprobaran ti National Price Coordinating Council (NPCC) ita nga aldaw, Enero 16, ti resolusion a mangdagadag iti Department of Agriculture (DA) a mangideklarar iti food security emergency para iti bagas gapu ta nangina pay laeng daytoy.
Segun ken ni Sekretaria ti Department of Trade and Industry (DTI) Ma. Cristina Roque, daulo ti NPCC, babaen ti deklarasion mapalunosan ti National Food Authority (NFA) a mangiruar iti lebbenda a bagas tapno agtalna ti presio daytoy.
Gapu itoy, sukatan ti NFA dagiti nairuarda nga stock babaen ti lokal a napataud a bagas.
Iti agdama, adda lebben ti NFA a 300,000 metrika tonelada a bagas.
Pannakaideklarar ti food security emergency, maudi a pamuspusan iti panangpalaka iti presio ti bagas
Inanamongan ni Sekretario ti DA Francisco Tiu Laurel Jr. ti naipaulog a resolusion ti NPCC, ket kinunana a maysa daytoy a napateg a tignay tapno mataming ti nangina a bagas.
Iti biang ti DA, kinuna ni Laurel nga addan ipatpatungpalda a wagas tapono maipababa ti presio ti bagas, ket maysa kadagitoy ti panangikeddeng iti kangatuan a presio ti imported a bagas iti PhP58 kada kilo mangrugi inton Enero 20.
Kinuna ni Laurel nga uray no saan a mangmangan iti innapuy, ti nababa a presio ti bagas ket makatulong iti ekonomia. (Dexter Barro II/Manila Bulletin//Lito Hilidon/Bannawag)
