Binaliwan manen ni Diputado ti AGRI Party-list Wilbert T. Lee ti nagkiddaw iti Department of Health (DOH) a pardasanda koma ti gumatang kadagiti ramit dagiti para iti publiko nga ospital tapno naan-anay ti pannakaipaay dagiti nainayon a benepisio ti Philippine Health Insurance Corporation (PhilHealth).
Kinuna ni Lee nga awan mamaay dagiti nainayon a benepisio no awan dagiti ramit ken ospital.
Dagiti ramit a kas iti Positron Emission Tomography (PET) scan, Computed Tomography (CT) scan, Magnetic Resonance Imaging (MRI), ken dadduma pay a diagnostic tests ken pasilidad ti dakdakamaten ni Lee.
Iti naangay a panangbista ti Committee on Health ti Kamara mainaig iti nanayonan a benepisio ti PhilHealth itay Enero 15, impaganetget ni Lee a dagiti napasayaat a serbisio ket masapul a buyogan iti kompleto a ramit ti ospital ken dadduma pay a medikal a pasilidad a kasapulan dagiti Filipino.
Pannakaideklarar ti food security emergency, maudi a pamuspusan iti panangpalaka iti presio ti bagas
Nupay binayaw ni Lee ti panagballigi ti PhiHealth a nangnayon iti baro a benepisio, impaganetgetna a ti nakurang nga ospital ken medikal a pasilidad ti manglapped iti pannakaipaay ti napintas ken magun-odan ti amin a benepisio ti salun-at, kadagiti Filipino. (Ellson Quismorio/Manila Bulletin//Lito Hilidon/Bannawag)
