Inkumit ni Presidente Ferdinand Marcos Jr. a mangted iti umdas a pondo para iti National Irrigation Administration (NIA) ta gandatna ti mangipatakder kadagiti dadakkel a dam iti pagilian.
Iti taripnong dagiti opisial ti NIA a naangay iti Malakanyang itay Enero 15, impaganetget ni Presidente Marcos ti kinapateg ti pannakaipatakder dagiti dadakkel a dam, saan laeng a para iti pasayak, no di ket para iti dadduma pay a pakausaran dagitoy.
Kinuna ni Marcos a kasapulan a mapondoan dagiti dadakkel a dam iti sidong ti 2025 General Appropriations Act (GAA).
Maibatay iti programa, aktibidad ken proyekto nga isayangkat ti NIA para iti 2025, PhP20.84 a bilion ti nailatang para iti Pump Irrigation Sub-Program ken PhP7.88 a bilion ti para iti Stage 2 ti Ilocos Norte-Ilocos Sub-Abra Irrigation Project.
Pannakaideklarar ti food security emergency, maudi a pamuspusan iti panangpalaka iti presio ti bagas
Nailatang ti PhP2.49 a bilion para iti Balog-Balog Multipurpose Project Phase II iti Tarlac, ket PhP99.5 a milion met ti para iti Special Irrigation Sub-Program.
Segun ken ni Eduardo Eddie Guillen, NIA Administrator, nairaman iti gandat ti ahensia ti pannakapasayaat ti irigasion, panangsigurado nga agtultuloy ti operasion dagiti agdama a serbisio ti irigasion, ken panangmantener kadagiti agdama a napadanuman a daga.
Imparang met ni Guillen dagiti planoda a mangpasayaat kadagiti kalsada iti igid dagiti kanal ti irigasion.
Mairaman iti programa ken proyekto ti NIA ti teknolohia ken pannakapabaro dagiti sistema ti irigasion tapno maep-ep ti epekto ti panagbalbaliw ti klima. (Betheena Unite/Manila Bulletin//Lito Hilidon/Bannawag)
