Ti pannakaaramid ti Metro Manila subway ket mangipaay iti estratehiko a pagsayaatan para iti Armed Forces of the Philippines (AFP), kinuna ti hepe ti militar a ni General Romeo Brawner Jr. ita nga aldaw, Enero 17.
Daytoy ti kinuna ni Brawner maysa nga aldaw kalpasan a dimmar-ay iti pannakayusuat ti tunnel boring machine (TBM) para iti Metro Manila Subway Project iti Camp Aguinaldo Station (MMSP-CAS) iti Siudad ti Quezon itay Enero 16.
Kinuna ni Brawner a saan laeng a ti AFP, no di ket ti adu a Filipino, ti agnumar iti maipatpatakder a Metro Manila subway.
Maibatay iti Contract Package 103 ti MMSP, uppat a TBM ti mausar iti usok iti Anonas ken Camp Aguinaldo Station.
Presidente Marcos, dina anamongan ti impeachment ni BP Duterte, ngem anamonganna ti kapanunotan ni JPE
Kinuna ni Jeremy Regino, DOTr Undersecretary for Railways, 13 pay a TBM ti mausar iti umay a tawen tapno nadaras a malpas ti umuna a subway ti pagilian.
Kinuna ni Regino a nupay nakedngan ti badietda para iti 2025, an-anayen pay ti DOTr ti agtrabaho iti pannakaibangon dagiti proyekto a riles tapno mapalag-an ti trapiko iti Metro Manila ken kabangibang a lugar.
Maibilang a "Crown Jewel" ti mass transit system ti Filipinas, ti 33-kilometro a Metro Manila subway ket agsaknap iti walo a siudad manipud iti Valenzuela City agingga iti FTI-Bicutan iti Parañaque City.
No malpas ti proyekto, agbalinen a 45 a minuto ti biahe manipud Valenzuela City agingga Pasay City, ket pagserbianna ti nasurok a kagudua-milion a pasahero iti inaldaw. (Martin Sadongdong/Manila Bulletin//Lito Hilidon/Bannawag)
