Nagtulag ti Israel ken Hamas nga isardengdan ti gubat iti Gaza Strip, kinuna dagiti mangibabaet itay Mierkoles, a nangitandudo iti posibilidad ti panagpatingga ti panagranget ti dua nga agkinnabusor a pagilian.
Nairaman iti tallo a paset a tulag ti ceasefire ti pannakaruk-at dagiti kinautibo dagiti rebelde iti Gaza ken ginasut a Palestino a naipupok iti Israel, ken palubosanda dagiti rinibu a tao a napapanaw iti Gaza nga agsubi kadagiti pagtaenganda.
Gapu iti daytoy, mapalubosanen ti iseserrek dagiti kasapulan unay a tulong para kadagiti tao iti lugar a riniribuk ti gubat iti las-ud ti 15 a bulan.
Kinuna ni Prime Minister ti Qatar a ni Sheikh Mohammed bin Abdulrahman Al Thani a mangrugi ti ceasefire inton Domingo ket agpannuray ti balligi daytoy iti kinasungdo ti Israel ken Hamas a mangtungpal iti tulag tapno saan a marakrak daytoy.
Trump, nasentensiaan iti pannakakonbiktarna iti <i>hush money case</i>
Intandudo ni Presidente ti Estados Unidos (US) Joe Biden ti tulag manipud iti Washington, ket kinunana nga agtalinaed ti ceasefire no agtalinaed iti negosasion ti Israel ken Hamas.
Iti kaudian a pakaammo, pinatalgedan ni Benjamin Netanyahu, Prime Minister ti Israel, nga adda nasangalen a tulag a maruk-atan dagiti nakautibo iti Gaza Strip ket ukkonenna ti Security Cabinet ita nga aldaw, Enero 17, ken ti gobierno tapno maaprobaran ti mapadpadaanan a katulagan.
Ginutigot ni Egyptian Foreign Minister Badr Abdelatty ti Israel ken Hamas nga ipatungpalda koma ti ceasefire plan iti Gaza iti kabiitan a panawen.
Segun iti tulag a nasangal idi Mierkoles, maruk-atan ti 33 kadagiti 100 a hostage nga adda iti Gaza iti las-ud ti innem a bulan a kasukat ti pannakaruk-at ket ti ginasut a Palestino a naipupok iti Israel. Pumanaw dagiti puersa ti Israel kadagiti adu a lugar tapno makasubli dagiti rinibu a Palestino kadagiti pagtaenganda, ken umadu ti sumrek a humanitarian assistance.
Iti sabali a bangir, maruk-atan dagiti natda a hostage, agraman lallaki a soldado, iti maikadua a paset ti tulag a ceasefire. Kinuna ti Hamas a saanda a ruk-atan dagiti natda a hostage no awan ti agpaut a ceasefire ken saan a pumanaw dagiti soldado ti Israel.
Insapata ti Israel nga agtultuloy latta ti pannakibakalda agingga a maungaw ti grupo ken agtalinaed ti awan patingganan a panangtengngelda iti teritorio.
Dagiti pagilian a US, Egypt, ken Qatar ti nagpaay a mangibabaet iti pannakabukel ti ceasefire agreement ti Israel ken Hamas. (Associated Press/Manila Bulletin//Lito Hilidon/Bannawag)
