Nagsango da TV host ken aktor Vic Sotto ken direktor Darryl Yap iti Muntinlupa Regional Trial Court (RTC) Branch 205 ita nga aldaw, Enero 17, gapu iti kaso a mainaig iti teaser video ti kontrobersial a pelikula a “The Rapists of Pepsi Paloma.”
Dimmatag da Sotto ken Yap iti Muntinlupa RTC a nangisayangkat iti summary hearing iti petision ni Sotto a writ of habeas data.
Iti nakuna a petision, kiniddaw ni Sotto iti korte a maikkat koma ti teaser video ken ti promotional material ti pelikula a nangiladawan ken nangdakamat iti "personal nga impormasionna wenno sensitibo a personal nga impormasionna." Nadakamat ti nagan ni Sotto nasao a teaser video.
Awan ti pakaammo dagiti dua maipapan iti kasoda gapu iti gag order nga impaulog ti korte.
Presidente Marcos, dina anamongan ti impeachment ni BP Duterte, ngem anamonganna ti kapanunotan ni JPE
Malaksid iti petition for writ of habeas data, impila pay ni Sotto ti 19 a kaso ti cyberlibel kontra ken ni Yap gapu iti "Pepsi Paloma" movie teaser.
Agdagup iti PhP35 a milion ti kidkiddawen ni Sotto a bayad ti danios manipud ken ni Yap - PhP20 a milion para iti moral damage ken PhP15 a milion para iti exemplary damage.
Iti affidavit ni Sotto, kinunana a "nupay ammona (Yap) a nawaswasen ti kaso a kriminal nga impila ni Pepsi Paloma a maibusor kaniak, inaramid latta ni Yap ti teaser video iti wagas a nalawag a nangiparang a siak ti maipagarup a nangrames ken ni Pepsi Paloma."
Naaramid ti summary hearing kalpasan a di pinatgan ti Muntinlupa RTC ti mosion ni Yap a pagtiponen ti petision ti writ of habeas data ken ti kaso a cyberlibel. (Jonathan Hicap/Manila Bulletin//Lito Hilidon/Bannawag)
