Ti pannakaideklarar ti food security emergency iti pagilian ti maudi a pamuspusan tapno maipababa ti presio ti bagas iti laksid ti panangikagumaan ti gobierno a mangpalag-an iti situasion.
Daytoy ti kinuna ni Presidente Marcos itay Enero 17 kalpasan nga impakaammo ti Department of Agriculture (DA) a mangideklarar daytoy iti food security emergency iti arinunos daytyoy a bulan tapno mataming ti agtultuloy nga ingingina ti bagas iti laksid ti pannakaibaba ti presio iti sangalubongan a merkado ken pannakakissay ti taripa.
Iti maysa nga interbiu iti Burauen, Leyte itay Enero 17, inlawlawag ni Marcos nga inaramiddan amin a pamuspusan tapno maipababa ti presio ti bagas, ngem saan latta a nagbaliw ti presio daytoy, isu a masapul nga ideklararda ti food security emergency iti pagilian.
Kinuna ni Sekretario ti DA Francisco Tiu Laurel itoy a lawas a ti food security emergency ti mangipalubos iti National Food Authority (NFA) a mangilako iti lebbenda a bagas kadagiti local government units (LGUs) ken dadduma pay nga ahensia ti gobierno, tapno mawayaan dagiti bodega ti NFA ken matulongan dagiti lokal a mannalon babaen ti pananggatang ti NFA kadagiti maapitdanto nga irik.
LTO, inkarina nga addanton plaka dagiti amin a traysikel agingga iti Abril 30
Mabalin nga ilako ti bagas ti NFA iti Philippine National Police (PNP), Armed Forces of the Philippines (AFP), ken dadduma pay a government agencies and government-owned and controlled corporations (GOCC).
Iti agdama, adda lebben ti NFA a 300,000 metrika tonelada a bagas.
Ti pannakaiklarar iti food security emergency ti manamnama a mangpalaka iti presio ti bagas iti PhP3 agingga iti PhP5. Ngem agsapsapul pay ti gobierno iti dadduma a pamuspusan tapno mataming ti krisis. (Argyll Cyrus Geducos & Dexter Barro II/Manila Bulletin//Lito Hilidon/Bannawag)
