"Agul-ulbod."
Dayta ti kuna ni Presidente Bongbong Marcos mainaig iti imbaga ni dati a presidente Rodrigo Duterte nga adda dagiti iregularidad ti 2025 national budget kas kadagiti blangko a paset daytoy.
"Nagpresidente. Ammona a saan a mabalin nga ipasa ti GAA (General Appropriations Act) no addaan kadagiti blangko a paset. Isu nga agul-ulbod," kinuna ni Marcos itoy nga aldaw, Lunes, Enero 20, itay mapagdamagan maipapan iti kunkunada nga adda dagiti binay-anna a blangko a paset ti 2025 national budget tapno mapunnuan wenno masuratanto lattan iti kayat a gated a kas iti blangko a tseke.
Kinuna ni Marcos nga iti pakasaritaan ti pagilian, saan pay a pulos a napasamak dayta, ket ammo unay ti sinukatanna a presidente dayta a banag.
"Iti pakasaritaan ti Filipinas, saan pay napalubosan a maaddaan ti GAA iti paset a saan a maipan no ania ti proyekto, ken no mano ti gasto ken pondo," impaganetget ni Marcos.
Panagwaras ti fake news iti pannakabista ti kaso nga impeachment ni Duterte, impakdaar ni Rep. Adiong
Ginuyugoy ti Presidente dagiti umili a kitaenda ti 4,000-panid a national a budget a naipaskil iti website ti Department of Budget and Management (DBM) ket kitaenda no pudno nga adda dagiti blangko a pasetna a wenno awan.
"Sapulenyo ti ibagbagada a blangko. Kitaenyo no adda, uray maymaysa, tapno paneknekanyo a pudno ti ibagbagak," kinuna ti presidente.
Immunan a sinupiat ti Malacañang, babaen ken ni Executive Secretary Lucas Bersamin, daytoy a kunkuna ti "sumagmamano a grupo, agraman ti maysa a dati a presidente" ta kunana a malisioso ti agiwaras kadagiti kakasta a peke a damag.
Inggunamgunamna nga imposible nga adda mabaybay-an a blangko a paset ti budget.
Kinuna met ni dati a presidential spokesperson Salvador Panelo a saan nga umisu ti sungbat ni Marcos agsipud ta saan a pinabasol ni Duterte ti presidente a nangipalubos kadagiti blangko a paset iti budget, no di ket inyebkas laeng ti dati a presidente ti legal nga opinion-na nga iti panagkunana ket agpayso ti ibagbaga ni Dip. Isidro Ungab ti Davao City.
"Kas met laeng iti saan nga umisu a sungbat ni PBBM a naibatay iti saan nga umisu a pagbasaran," innayon ni Panelo.
(Betheena Unite/Manila Bulletin)
