Maysa a pro-children’s group ti nagkuna a saan a pudno ti pammabasol nga agiwarwarasda iti fake news ken pammutbuteng kontra iti Comprehensive Sexuality Education (CSE).
“Ti Project Dalisay ket saan a kampania kontra iti asino man a politiko, iti asino man a senador, ken nakarkaro pay nga awan panggepmi nga agiwaras iti pammutbuteng,” kinuna ni Project Dalisay representative, dati chief justice Maria Lourdes Sereno.
“Aminkami ket makumikom iti panagbiagmi ngem mangisingsingaykami iti oras tapno mamallaagkami kadagiti isyu a mabalin a di maamiris ti kaaduan, a pakaibilanganmi, ti ibungana,” innayonna.
Ti Project Dalisay ket maysa a proyekto ti National Coalition for the Family and the Constitution (NCFC).
Pastor Quiboloy, naisublin iti Pasig City Jail
Sungbat ni Sereno daytoy iti pammabalaw ni Sen. Risa Hontiveros iti video ti Project Dalisay a kuna ni Hontiveros nga agpanggep laeng a mangdadael iti Senate Bill No. 1979, nga am-ammo pay a kas Prevention of Adolescent Pregnancy Act.
“Nakakagulat at nakakagalit ang mga kasinungalingan na kumakalat sa social media laban sa panukalang batas na ito,” kinuna ni Hontiveros ken autor ti gakat iti CSE.
Kinuna ni Sereno nga ilawlawag laeng ti video of Project Dalisay “dagiti peggad ti CSE a maysa nga international sexuality program a NAISERREK ITI GAKAT, gapu iti no namin-ano a pannakadakamat dagiti termino a ‘Comprehensive Sexuality Education’, ‘CSE’ ken ‘International Standards."
“Isingasing daytoy a programa a maisuro kadagiti ubbing ti Sexuality Education iti kasapaan a paset ti panagbiagda no mabalin ket maisuro ti amin-amin kadakuada,” kinuna ni Sereno.
Imballaag ni Sererno a “dagitoy international standards” a nadakamat iti gakat ken iti DepEd DepEd (Department of Education) Memo 31, ket saan laeng nga awan mamaayda ngem ketdi mangibungada iti dakes kadagiti ubbing.
“Saantayonto a makita dagiti aktual a balikas a kas iti ‘childhood masturbation’ iti gakat ngem iti maulit-ulit a pannakadakamat ti CSE, ken iti pannakaibilin ti pannakayimplementar ti CSE kadagiti amin nga eskuela iti sapasap a pagilian, maawatan laeng a ti madakdakamat ditoy ket dagiti dua nga adda a dokumento a mangsakup kadagiti international standards ti CSE—TI UNESCO guideline ken ti WHO guideline, nga agpada nga agkuna a ti panagsalsal (masturbation) ket normal laeng, saan a makadangran, sa maisuro daytoy kadagiti ubbing iti nasapa a paset ti biagda. Dagitoy ket “RED FLAGS” a rumbeng a dupiren ti tunggal nagannak a Filipino,” innayon ni Sereno.
Iti sabali a bangir, kiniddaw ni Sereno a rumbeng a mapagsasaritaan koma iti publiko ti nasao a gakat.
“Awan man laeng ti naawis kadakami iti ania man a hearing agingga iti naammuanmi daytoy ngem naladawen,” kinuna ni Sereno.
Innayon ni Sereno nga awan ti karbengan ti Project Dalisay nga agsaludsod maipanggep iti gakat bayat ti Senate interpellation.
“Ti laeng mabalinmi a maaramid tapno maammuan ti sangapagilian ti pagtaktakderanmi ket babaen dagiti nadumaduma a media ken dagiti agpampanday-linteg a mayat a dumngeg kadakami,” innayonna.
“Sidadaankami a makitungtong kadagiti umili a Filipino tapno ikutuanmi ti SB 1979. Panawenen a pagsaritaantayo no ania ti ipatpategtayo unay – dagiti annaktayo, dagiti pamiliatayo, ken no kasano ti panangipategtayo kadakuada,” kinuna ti dati a chief justice. (Jeffrey Damicog/ Manila Bulletin)
