Nagsapata ni Donald Trump a kas maika-47 a Presidente ti Estados Unidos (US) itay Enero 20, ket inkarina ti "revolution of common sense." Itoy a panagtakemna, idauluanna met ti nagkaykaysa a panangtengngel dagiti Republikano iti Washington nga aggandat a mangbaliw kadagiti institusion ti pagilian. Inkarina pay a waswasenna amin nga inaramid ti sinarunona a presidente.
Naikkan ni Trump iti maikadua a termino nga agakem iti White House kalpasan a malasatanna dagiti impeachment, kriminal a kaso, ken dua a panaggandat a panangpapatay kenkuana.
Kalpasan ti seremonia, agtignay a dagus ni Trump a mangipaulog kadagiti executive order a nakasaganan a pirmaanna tapno maipasardeng ti ilegal nga iseserrek iti Amerika, mapaadu ti maipatakder a pagtaudan ti fossil fuel, ken maigibus iti panagduduma.
Gapu ta kontrolado dagiti Republikano ti Kongreso, makitinnulongda iti baro nga administrasion a mangwaswas iti polisia ni Joe Biden tapno maitandudo dagiti bukodda a prioridad.(Associated Press/Manila Bulletin//Lito Hilidon/Bannawag)
