Impeksa ti Office of Civil Defense (OCD) ti pannakipagrikna ti Filipinas iti Taiwan, kalpasan ti panangdalapus ti 6.4-magnitude a ginggined iti nasao a pagilian.
“Ipeksami ti pannakipagriknami kadagiti biktima ti ginggined idiay Taiwan. Idatonmi dagiti kararagmi bayat ti ibabangonda kadagiti pukaw ken aliaw a nagpasaranda a pinataud daytoy a didigra,” kinuna ni OCD Administrator Undersecretary Ariel Nepomuceno.
Immuna nga impadamag ti United States Geological Survey (USGS) nga agpigsa ti ginggined iti 7.0 iti pagrukodan, napasamak daytoy iti alas 12:17 iti parbangon. Saan a kumurang a 27 a tao ti nasugatan, ken gapu iti pigsana, nangparnuay daytoy iti panagreggaay ti daga a nakaigapuan met ti dakkel a dadael kadagiti pagtaengan.
Segun iti USGS, masarakan ti nagpigsaan ti ginggined 12 a kilometro iti amianan ti distrito ti Yujing iti akin-abagatan a Taiwan. Impadamag ti Central Weather Administration ti Taiwan nga addan nasurok a 50 nga aftershock sipud napasamak ti damo a ginggined.
Kinuna ni Nepomuceno a kas iti Filipinas, nalaka nga agginggined ti Taiwan gapu ta adda iti pingir ti dua a tectonic plate iti asideg ti Pacific Ring of Fire.
Panagwaras ti fake news iti pannakabista ti kaso nga impeachment ni Duterte, impakdaar ni Rep. Adiong
Segun iti OCD, nagpasar met ti Taiwan iti napigsa a ginggined idi Abril 2024 — maysa a 7.4-magnitude a ginggined a nangala iti 17 a biag ken nangdadael kadagiti pasdek iti daya a Hualien County. Sakbay dayta, ti intensity 7.6 a ginggined a napasamak idi 1999, dinadaelna ti rinibu a pasdek ken kinettelna ti 2,400 a biag ket maibalang daytoy a maysa kadagiti kadadaksan a didigra iti pakasaritaan ti rehion.
Dinayaw ni Nepomuceno ti panangipatungpal ti Taiwan kadagiti napabaro nga addang, agraman ti pannakapasayaat dagiti building code iti panagbangon iti pasdek a naandur iti ginggined, ken panangipasdek kadagiti early warning system tapno nasapa a mapakdaaran ti publiko iti nakaro a gingginged.
“Mabalin nga adayotayo pay iti dayta a kabaelan, ngem makadanontayto babaen ti panagkaykaysatayo a mangbangon iti Filipinas a naandur iti didigra. Maysa ngarud a nangato nga opisial ti UN (United Nations) ti nangbigbig kadagiti ar-aramidentayo—banag a mangipasimudaag nga addatayo iti umisu a dana,” kinuna ni Nepomuceno.
Gapu iti daytoy, indagadagna kadagiti umili iti Filipinas a makikaykaysada a mangipangpangruna iti panagsagana para iti ‘Big One,’ ti kunkunda a dakkel a ginggined a mabalin a mangdalapus iti Filipinas ken mangipaay iti dakkel a didigra.
“Dumteng ti didigra iti ania man a kanito. Napateg unay nga i-level-up-tayo ti panagsaganatayo. Laglagipentayo a ti kinatalgedtayo, saan laeng nga agpannuray kadagiti umay manangispal kadatayo wenno iti ahensia ti gobierno. Responsibilidadtayo dayta. Agtignaytayo itan ta napateg uray dagiti kababassitan a panagsagana,” innayon ni Nepomuceno.
(Martin Sadongdong/Manila Bulletin
