Kas panangipaduyakyakna iti suronna kadagiti rinuker wenno managkunniber nga opisial ti gobierno, nangipila ni Zamboanga 1st district Rep. Khymer Adan Olaso iti gakat a mangikalikagum iti pannakaipakat ti dusa a patay babaen ti firing squad wenno pannakapaltog kontra kadagiti rinuker a public servant.
Nailanad iti impila ni Olaso a House Bill (HB) No.11211 wenno "Death Penalty for Corruption Act" a sakupen ti nasao a pannusa amin nga opisial ti publiko manipud iti Presidente iti Malakanyang agingga iti kababaan nga opisial ti barangay.
"Saan laeng a pannusa daytoy a gakat no di ket simboliko pay iti zero-tolerance policy ti Filipinas para iti korupsion," kinuna ni Olaso iti explanatory note ti gakatnana.
"Babaen ti pannakaipasa daytoy a lehislasion, ipasingked ti Kongreso a kapatgan pay laeng ti integridad ken accountability iti serbisio publiko ket saan a mapanuynoyan dagiti saan a maiparbeng a panagusar kadagiti rekurso ti publiko," kinunana.
17 a Vlogger, nagkamang iti Korte Suprema
Nawaswas ti dusa a patay idi 2006 iti panawen ni dati a presidente Gloria Macapagal-Arroyo. Kadua itan ni Arroyo ni Olaso iti agdama a maika-19 a Kongreso.
Lethal injection ti naaramat iti naudi a pannakaisayangkat ti dusa a patay iti Filipinas.
Mabasa iti HB 11211 a "babaen daytoy a singasing a gakat, maikalikagum ti ultimo a pannusa nga ipapatay babaen ti firing squad kadagiti opisial ti publiko--manipud iti Presidente agingga iti kababaan nga opisial ti barangay--a nakonbiktaran ti Sandiganbayan iti graft and corrupsion, malversation of public funds, ken plunder."
Segun iti diputado a taga-Mindanao, agtaltalinaed ti korupsion a maysa kadagiti kakakaruan a pangta iti panagdur-as ti kagimongan, ekonomia, ken politika ti Filipinas.
"Iti laksid ti kaadda dagiti adu a linteg a nairanta a manglaban iti panagkunniber, malversation, ken plunder, ti panagtultuloy dagitoy a krimen ket mangipampaneknek laeng a dagiti agdama a wagas (ti linteg) ket saan nga umdas a manglapped kadagiti opisial ti publiko nga agkunniber," kinuna ni Olaso.
Kinuna pay ni Olasa a mairaman iti nasao a gakat dagiti safeguard tapno masigurado a maipatungpal ti due process ken constitutional protections.
"Dagiti pannakakonbiktar ket masapul a pasingkedan ti Korte Suprema, agdalan iti automatic review process, ken mapalubosan ti akusado a mangiwayat iti amin nga adda a legal a remedio," nsurat ni Olaso iti singasingna. (Ellson Quismorio/MB)
