February 14, 2025

Home DAMDAMAG Internasional

22 nga Estado, simmupiat iti gandat ni Trump a mangwaswas iti 'birthright citizenship'

22 nga Estado, simmupiat iti gandat ni Trump a mangwaswas iti 'birthright citizenship'

Dimmatag iti korte dagiti Attorney General manipud iti 22 nga Estado itay Enero 21, tapno supiatenda ti gandat ni Presidente ti Estados Unidos (US) Donald Trump a mangwaswas iti birthright citizenship a mangibilang kadagiti nayanak iti US a kas umili (citizen) ti US, uray ania ti kasasaad ti nagannak kadakuada.

Ti agarup 700 a balikas nga executive order a naipaulog idi Lunes (Enero 20), ti pannakatungpal dagiti inkarina idi panagkakampania. Ngem saan a masigurado no agballigi daytoy gapu iti posible a legal a pannakidangadang ti polisia ti presidente mainaig iti imigrasion ken ti birthright citizenship nga impaay ti Konstitusion.

Kinuna ni New Jersey Attorney General Matt Platkin a saan a mabalin a mawaswas ti 14th Amendment babaen laeng ti panagbilin ti presidente.

Segun iti birthright citizenship, maibilang nga umili ti Estados Unidos (US citizen) ti asinoman a nayanak iti US, uray ania ti kasasaad dagiti nagannak kenkuana.

Internasional

Cabie-Quinto, pinadayawan ti COFACC

Dimmatag met iti Federal Court ti estado ti District of Columbia ken San Francisco, kasta met dagiti nadumaduma a chapter ti American Civil Liberties Union iti New Hampshire, Maine, ken Massachusetts.

Malaksid iti New Jersey, makipaset met ti estado ti California, Massachusetts, Colorado, Connecticut, Delaware, Hawaii, Maine, Maryland, Michigan, Minnesota, Nevada, New Mexico, New York, North Carolina, Rhode Island, Vermont, ken Wisconsin tapno lapdanda ti pammilin ti presidente.

Dimmatag met iti Federal Court ti estado ti Arizona, Illinois, Oregon ken Washington tapno supiatenda ti impaulog ni Trump. (Associated Press/Manila Bulletin//Lito Hilidon/Bannawag)