Kinondenar ti 101st Infantry Brigade (IB) ti Philippine Army ti panangtambang ti grupo a Moro Islamic Liberation Front kadagiti soldado iti Barangay Lower Cabengbeng iti Sumisip, Basilan idi malem ti Enero 22, a nangpataud iti panagduadua iti akem ti grupo a mangitandudo iti kappia iti probinsia.
Segun iti 101st IB, salsalakniban dagiti soldado ti 32nd IB ti Barangay Lower Cabengbeng idi pinaltogan ida ti grupo nga indauluan da Najal Buena ken Oman Hajal Jalis, nga agdindinamag a tulisan a nairaman kadagiti panagrinnupak iti lugar.
Maysa pay a grupo ti soldado a mapan makiuman kadagiti pannakabagi ti United Nations Development Program kas paset ti Project Modeling Livelihood Initiatives ti nagdardaras a nagturong iti naggpauan ti kanalbuong ti paltog, ngem pinaltogan ida ti sabali pay nga armado a grupo a naaipadamag a kameng ti MILF.
Dua a soldado ti natay, ket pito ti nadangran. Naipanda iti maysa nga ospital iti Lamitan City, Basilan.
Maipadpadamag a 'kumaw' iti Nueva Vizcaya, 'fake news,' segun iti PNP
Dua met ti napapatay iti biang dagiti tulisan ken dida pay ammo no mano ti nadangran.
Kinuna ni Brig. Gen. Alvin Luzon, commander ti 101st IB, nga awanen ti armado a lallaki iti lugar ket makikoordinasionda kadagiti daulo ti MILF.
Iti sabali a bangir, inkalintegan ti MILF ti inaramidda ket impettengda a simrek lattan dagiti soldado ti gobierno iti 114th Base Command-da nga awan pammalubos.
Kinuna ni Anwar Alamada, daulo ti MILF Ad Hoc Joint Action Group, linabsing dagiti soldado ti tulag a ceasefire iti nagbaetan ti MILF ken gobierno.
Innayon ni Alamada a no kayat dagiti soldado ti gobierno ti sumrek, masapul nga agpakadada nga umuna iti CCCH (Coordinating Committees on the Cessation of Hostilities).
Kinuna ni Luzon a makium-umandan iti MILF-CCCH tapno imbestigarenda ti pasamak ken maliklikan daytoy iti mapasungad. (Keith Bacongco & Liza Jocson/Manila Bulletin//Lito Hilidon/Bannawag)
