Sisiimen ti Department of Agriculture (DA) iti agdama ti ngumatngato a presio ti karne ti baboy kadagiti lokal a merkado tapno maammuan no adda pakainaiganna iti saan a maikanatad a panagganansia.
Napaliiw ni DA Secretary Francisco Tiu Laurel nga agparparang a kas iti panagngina ti bagas ti mapaspasamak iti panagngina ti karne ti baboy.
“Ngem, siempre, kuenkuentaenmi metten ti value chain a kas iti inaramidmi iti bagas. Tapno makita no kasano a mabalanse daytoy," kinuna ni Laurel kadagiti reporter idi Huebes, Enero. 23.
Ti value chain ket isu dagiti aramid a paglasatan ti maysa a produkto agingga a mayeg ti plato ti aggatang.
Panagangkat iti 25,000 a tonelada nga ikan, inaprobaran ti DA
Iti agdama, iti Metro Manila, agay-ayam manipud iti P360 agingga iti P380 ti presio ti buksit ti baboy (pork belly), idinto nga adda iti nagbaetan ti P340 agingga iti P400 ti pork kasim (ham).
Iti sabali a bangir, ti frozen pork, aggatad iti P230 agingga iti P280 ti kasim, idinto a P270 agingga iti P350 ti liempo.
Kinuna ni Laurel a nainget ti panangbambantayda kadagitoy a presio iti napalabas a dua a lawas.
"Ti farmgate ita ket P220 agingga 240 laeng, isu a kasla agpadada iti problema iti bagas," inlawlawagna.
Kinuna ti sekretario ti Agriculture a ti fair profit margin, wenno maikanatad a presio, rumbeng a limitado iti retail price a P300-P320 kada kilo.
Nupay kasta, dina pay masigurado no ti nangato a presio ti karne ti baboy adda pakainaiganna iti profiteering wenno saan a maikanatad a panagganansia.
“Ikkandak iti dua a lawas ket ibagakto kadakayo no adda wenno awan,” kinunana kadagiti kameng ti prensa.
Immunan nga imbaga ti DA a ti panagngato ti presio ti karne ti baboy, maigapu iti epekto ti African Swine Fever (ASF) ken ti dakkel a panagkasapulan iti tagilako bayat ti holiday season ti 2024.
Mapattapatta a bumaba ti presio inton Pebrero ta mapaadunto manen dagiti agtartaraken iti baboy dagiti tarakenda.
Naulimek ni Laurel idi napagsaludsodan no ikonsiderar ti ahensia ti pannakaipatungpal ti maximum suggested retail price (MSRP) iti karne ti baboy.
Nangyetnagen ti DA ti kastoy kadagiti imported a bagas. Naikeddeng ti P58 tunggal kilo.
(Dexter Barro II/Manila Bulletin)
