Nakasaganan ti Department of Social Welfare and Development (DSWD) a mangiwaras iti First 1,000 Days of Life (F1KD) conditional cash grant kadagiti agarup 80,000 a pamilia a benepisiario ti Pantawid Pamilyang Pilipino Program (4Ps) manipud ita a bulan.
“Mangrugi iti Enero 2025, irugitayo daytoy napasayaat a serbisio para kadagiti benepisiario ti 4Ps, a mangipamaysa kadagiti masikog ken ubbing nga awan pay makatawenna agingga iti agtawen iti 2,” kinuna ti DSWD Director ken 4Ps National Program Manager Gemma Gabuya.
Indagadag ti DSWD kadagiti grantees ti 4Ps nga i-update-da ti beneficiary data-da tapno masigurado a maikarida iti F1KD conditional cash grant.
“Al-allukoyenmi dagiti benepisiario a dagus nga ireport ken i-update-da ti kasasaadda no masikogda wenno nabiit pay a nagpasngayda. Makatulong daytoy kadakami a mangmonitor iti bilang dagiti benepisiario,” kinuna ni Gabuya.
Panagangkat iti 25,000 a tonelada nga ikan, inaprobaran ti DA
Nadisenio daytoy a conditional cash grant a mangitandudo iti nasalun-at a kababalin kadagiti benepisiario. Tapno kualipikado, masapul a matungpal dagiti kasapulan mainaig iti salun-at, agraman ti panagpakita sakbay ti panagpasngay kadagiti pasilidad ti salun-at nga akreditado ti Department of Health (DOH); panangawat iti ante-natal care ken panangmonitor iti panagsikogda; panagpakita kalpasan ti panaganak; pannakipaset kadagiti counseling session, ken yaawat kadagiti micronutrient supplement ken immunization.
Mayalubog dagitoy a kasapulan iti Kalusugan at Nutrisyon ng Mag-Nanay Act (Republic Act No. 11148) ken kadagiti health protocol ti DOH.
Inlawlawag ni Gabuya a ti panagpuonan iti salun-at ken edukasion kadagiti babassit nga ubbing, nayonanna ti potensialda iti napaut a balligi.
“No nasalun-at ken naadalan a nasayaat ti maysa nga ubing, dakdakkel ti gundawayna a makaturpos iti panagbasana ket makalisi iti kinapanglaw,” kinunana.
Ti 4Ps, ti kangrunaan a programa ti gobierno para iti pannakakissay ti kinapanglaw, ket mangipapaay iti pinansial a tulong kadagiti napanglaw a pamilia iti pagilian tapno mapasayaat ti salun-at, nutrision, ken edukasion, nangruna kadagiti ubbing nga agtawen iti 18 ken nababbaba.
(Ellalyn De Vera-Ruiz/Manila Bulletin)
